Sidade Vaticano (RV) -Iha kuarta  4 Abríl, Amu-Papa kontinua fali katekeze kona-ba Tinan Fiar nian ne’ebé ninia predesesór, Bento XVI hahú, hodi ko’alia kona-ba Kredu no espresaun: “Liutiha loron tolu nia moris hi’as, tuir Eskritura”.

“Ne’e mak eventu ne’ebé ita selebra daudaun”, Francisco destaka, sentru mensajen sarani nian. Lialoos ida-ne’e loke ita ba futuru esperansa nian ne’ebé Maromak haraik mai ita, ba ksolok nakonu, serteza katak salan no mate la bele manán ida. Serteza ne’e mak halo ita bele moris ho konfiansa realidade loroloron nian, ba hasoru nia ho aten-barani no dedikasaun, iha serteza katak Kristu mak ita-nia forsa.

 

[Asesu kópia ho lia-portugés]

Iha Testamentu Foun, Jezús Moris-hi’as hasoru testemuña oioin, uluknanai grupu ida feto sira-nian, tuirmai Pedro, hafoin ema liu atus lima, to’o enkontru ho Paulo, iha lurón Damasco nian.

Maibé, iha profisaun fiar nian Testamentu Foun nian, fó hanoin de’it katak sasin sira Resureisaun nian mak mane sira de’it, Apóstolu sira, la fó hanoin kona-ba feto sira. Ne’e tanba tuir lei judeu sira nian iha tempu ne’ebá, feto no labarik sira la bele fó sasin ne’ebé ema bele fiar. Iha Evanjellu fali, feto sira iha papél fundamentál. Ida-ne’e atu hateten katak “Maromak la hili tuir kritériu umanu sira: sasin uluk Jezús nia moris mak bibi-atan sira, ema simples no harai-an; sasin uluk Resureisaun nian mak feto sira” Amu-Papa hateten. Ba Nia, buat ne’ebé konta mak ema nia fuan, oinsá ita loke an ba Nia, se ita hanesan labarik sira, ne’ebé hatene saran an.

“Apóstolu no dixípulu sira iha difikuldade liu atu fiar. Feto sira lae”. Buat ne’e halo ita reflete mós kona-ba oinsá feto sira, iha kreda no ida dalan fiar nian, soi papél espesiál uluk no ohin mós atu loke odamatan ba Na’i, atu komunika nia futar Oin, tanba hateken fiar nian presiza nafatin hateken kle’an domin nian.

“Inan sira no feto sira, ba oin ho sasin ida-ne’e” – Amu-Papa husu.  “Ksolok atu hatene katak Jezús moris,  esperansa ne’ebé hakonu fuan, la bele tahan metin. Ne’e mak tenke akontese mós ba ita-nia moris. Ita sente ksolok sai sarani! Ita tenke iha korajen atu “sai” atu lori ksolok no naroman ne’e ba fatin hotu ita-nia moris nian! Kristu nia Resureisaun mak ita-nia rikusoin presiozu liu.”

Iha ita-nia dalan fiar nian, importante hatene katak Maromak hadomi ita, keta ta’uk atu hadomi Nia: ita profesa fiar ho ibun no ho fuan, ho liafuan no ho domin.

Ita mós bele rekoñese no hasoru Na’i moris-hi’as: iha Sagrada Eskritura; iha Eukaristia, iha-ne’ebé Jezús hatudu nia prezensa no halo ita moris iha komuñaun ho Nia; iha karidade, bainhira jestu sira domin, laran-di’ak, laran-sadia no perdaun nian halo atu atu Resureisaun nia roman oan ida nabilan iha mundu.

“Mai ita husik Kristu nia Resureisaun leno ita, mai ita husik atu nia kbiit nakfilak ita, atu sinál sira mate nian iha mundu bele fó fatin ba sinál sira vida nain.”