Amu-Papa Francisco nia liafuan remata Via Crucis iha Coliseu

 

Maun-alin no biin-alin sira,

“Ha’u agradese imi tanba imi partisipa barak loos iha momentu orasaun intensa ida-ne’e. No ha’u agradese mós ba sira ne’ebé hamutuk ho ita liuhusi meiu komunikasaun sira, liuliu ema moras no katuas no ferik sira.

 

Ha’u lakohi aumenta lifuan barak. Iha kalan ida-ne’e tenke hela de’it liafuan ida, katak Krús.

Jezús nia Krús mak Liafuan ne’ebé Maromak uza atu hatán ba mundu nia aat. Dalaruma parese Maromak la hatán ba  aat, hela iha silénsiu, Loloos Maromak ko’alia, Maromak hatán, no ninia resposta mak Krús Kristu nian: Liafuan ida domin nian, laran-sadia nian, perdaun nian. No mós tesi-lia nian: Maromak tesi lia ba ita hodi hadomi ita, Se ha’u simu ninia domin ha’u hetan salvasaun, se ha’u rekuza ha’u hetan kastigu, la’ós husi Nia, maibé husi ha’u rasik, tanba Maromak la kondena. Nia hadomi no salva de’it.

Maluk sira, liafuan Krús nian mak resposta sarani sira-nian mós ba aat ne’ebé kontinua halo ninia hahalok iha ita no iha ita-nia sori-sorin. Sarani sira tenke hatán ba aat ho di’ak, hodi lori Krús, hanesan Jezús. Kalan ne’e ita rona ita-nia maun-alin sira husi Líbano nia sasin: sira mak hakerek meditasaun no orasaun furak ne’e. Ho fuan ha’u agradese sira ba servisu ida-ne’e no liuliu ba sasin ne’ebé sira fó. Ita haree, bainhira Papa Bento ba iha Líbano: ita haree fafurak no forsa komuñaun nian iha sarani sira Rai ne’ebá nian no amizade husi maun-alin musulmanu barak no sira barak seluk tan. Sinál ida ba Medio Oriente no ba mundu tomak: sinál ida espersansa nian.

Mai ita kontinua Via Crucis ida-ne’e loroloron. Mai ita la’o hamutuk iha dalan Krús nian, ita la’o hodi lori iha fuan Liafuan domin no perdaun nian ida-ne’e. Mai ita la’o hodi hein Jezús nia Moris-hi’as, ne’ebé hadomi tebes ita. Nia mak domin loos de’it!”.

 

Meditasaun ba Via-Sakra 2013 iha Coliseu, foin-sa’e sira Líbano nian mak prepara ho orientasaun husi Sua Beatitude Eminentíssima Señór Kardeál Béchara Boutros Raï.