Liturjia domingu ne’e nian propoin mai ita reflesaun ida kona-ba valór ruma ne’ebé akompaña dezafiu “Reinu” nian: haraik-an, gratuidade, domin lahó interese.

Evanjellu koloka ita iha ambiente han hamutuk iha farizeu ida nia uma, kontestu atu ko’alia kona-ba “han-hemu hamutuk iha Reinu”. Ba ema hotu ne’ebé hakarak partisipa iha “festa han-hemu” ida-ne’e, Jezús rekomenda haraik-an; tempu hanesan, Nia ko’alia sai kona-ba sira ne’ebé iha atitude hodi moris lójika ambisaun nian, luta ba podér no rekoñesimentu, superioridade iha relasaun ho ema seluk… Jezús sujere mós, katak ema hotu simu konvite ba “han-hemu Reinu nian”; no katak gratuidade no domin lahó interese tenke karakteriza relasaun entre partisipante sira “festa han-hemu” nian.

Iha leitura dahuluk, matenek-na’in ida inísiu sekulu II mK fó konsellu kona-ba haraik-an nu’udar dalan atu haksolok Maromak no ema sira, atu iha ézitu no hetan ksolok. Ne’e mak repetisaun fundamentál ne’ebé Maromak nia Liafuan ohin aprezenta mai ita.

Leitura daruak konvida fiar-na’in sira ne’ebé hakdasak iha fiar kómodu no lahó ezijénsia boot, atu deskobre fali novidade no ezijénsia kristianizmu nian; nia insiste katak enkontru ho Maromak mak esperiénsia ida komuñaun, prosimidade, domin, intimidade nian, ne’ebé fó sentidu ba ema sarani ninia dalan. Ita bele liga ida-ne’e ho tema sentrál liturjia ohin nian – haraik-an, gratuidade, domin lahó interese – liuhusi tema ezijénsia nian: moris sarani nian – moris ne’ebé suli husi enkontru ho Maromak nia domin – mak moris ida ne’ebé ezije husi ita valór no atitude determinadu, entre sira-ne’e mak haraik-an, simplisidade, domin ne’ebé saran nu’udar don.

Download