Sidade Vaticano – Papa Francisco realiza niia Audiénsia Jerál dahuluk iha kuarta ne’e, 27 iha Prasa S. Pedro, iha Vaticano, nakonu ho sarani sira. Santo Padre dedika ninia Katekeze ba Semana Santa no esplika katak, liutiha Páskua, nia sei foti fali Katekeze sira Tinan Fiar nian, hanesan ninia predesesór halo tiha ona.

“Maibé, ba ita katak sá moris Semana Santa?”, Papa husu. “Akompaña Jezús iha nia dalan ba Krús no Moris-hi’as. Iha nia misaun iha rai ne’e, nia ko’alia ba ema hotu, lahó distinsaun, ba boot no ba ki’ik sira, lori Maromak nia perdaun no laran-sadia, oferese esperansa; konsola no kura. Nia mak prezensa domin nian “.

 

[Asesu kópia ho lia-portugés]

 

Pontífise esplika katak iha Semana Santa, “ita moris Jezús nia dalan nia tutun, ne’ebé saran an voluntariamente ba mate atu korresponde ba Aman Maromak nia domin, ho uniaun perfeita ba ninia vontade, atu hatudu nia domin mai ita”.

Hafoin, Santu Padre husu: “Buat ne’e hakarak dehan sá mai ita?”, no esplika katak dalan ne’e mós, “ha’u-nian, ó-nian, ita-nian”.

“Moris Semana Santa hodi tuir Jezús katak aprende sai husi an rasik, ba hasoru ema seluk, ba iha periferia ezisténsia nian, hasoru liuliu sira ne’ebé dook liu, sira ne’ebé presiza komprensaun, konsolasaun, tulun. Moris Semana Santa katak tama liután iha Maromak nia lójika, Evanjellu nian. Maibé akompaña Kristu ezije atu ita sai husi an rasik, husik tiha modu atu moris fiar ho kolen no rotineiru. Maromak sai husi An rasik atu mai hasoru ita no ita mós tenke halo hanesan”.

Falta tempu la’ós razaun ka deskulpa, Papa dehan. “Ita la bele kontente ho orasaun ida, Misa dominikál ida distraída no la konstante, jestu ruma karidade nian, no la iha aten-barani  atu ‘sai’ hodi lori Kristu”.

Hotu tiha Katekeze, hanesan baibain, Pontífise kumprimenta grupu sira ne’ebé iha ne’ebá. Francisco la ko’alia iha lia oioin, maibé iha italianu. Tradutór sira mak halo tradusaun sínteze katekeze nian nune’e mós lee ninia saudasaun sira ho lia oioin.

Kinta Santa nia sei selebra ho foin-sa’e sira be hetan kastigu iha kadeia ba menoridade sira iha Casal del Marmo (Roma).