Liturjia domingu ne’e nian propoin mai ita tema “salvasaun” nian. Asesu ba “Reinu” – ba vida nakonu, ba ksolok totál (salvasaun) – mak don ida Maromak oferese ba mane no feto hotu, lahó esesaun; maibé atu to’o iha ne’ebá, presiza hakribi moris ida foti-an nian, egoísta, auto-sufisiente, prepotente, no tuir Jezús iha dalan domin nian, saran-an nian, don moris nian.

Iha primeira leitura, profeta ida la identifika sé loos, propoin mai ita vizaun ida komunidade eskatolójika” nian, komunidade universál, ne’ebé povu raiklaran tomak iha asesu. Jentiu sira rasik simu bolun atu fó sasin Liafoun Di’ak Maromak nian no simu konvite atu serví Maromak, lahó diskriminasaun ida bazeia ba rasa, etnia eh orijen.

Iha Evanjellu, Jezús – konfronta ho pergunta ida kona-ba númeru ema sira ne’ebé hetan salvasaun – nia sujere katak festa han-hemu iha “Reinu” oferese ba ema hotu; maski nune’e laiha billete rezervadu eh entrada garantida: presiza halo opsaun atu liu husi “odamatan kloot” no aseita tuir Jezús hodi saran an iha domin totál ba maluk sira.

Leitura daruak aborda ho forma oinseluk asuntu “odamatan kloot”: fiar-na’in ne’ebé loos enfrenta ho aten-barani terus no provasaun sira, haree sinál sira Maromak nia domin nian, ne’ebé eduka, korrije, hatudu mai ita oinsá opsaun ruma ita halo la iha sentidu no prepara ita ba moris foun “Reinu” nian.

Download