Irmán doben sira, foin-sa’e sira, leigu no leiga sira hotu,

Ita iha ona dalan kuarezma nia rohan, tempu ida ho rikusoin espirituál pesoál no komunitária, loron sira atu habiit ita-nia moris espirituál hodi hakbesik ba Maromka nia Liafuan ne’ebé lori ita iha Jezús nia dalan ba Jerusalém.
Ita moris daudaun tempu grasa nian ba Kreda, maibé mós terus no inserteza nian no fiar no karidade de’it mak bele fó seguransa, katak Maromak iha Jezús, la’o ho ita no kontinua haraik Espíritu Santu ba sira ne’ebé husu!

Ita hatene katak iha loron 11 Fevereiru 2013 marka etapa foun iha Kreda nia istória. Durante Konsistóriu ordináriu Bento XVI rasik fó sai ninia renúnsia ba “ministériu petrinu”, Bispu Roma nian no Susesór S. Pedro nian. Liutiha tinan ualu ita-nia Santu Padre deside ho liberdade tomak atu husik knaar pontifikadu nian no husi loron 28 Fevereiru nia sai “Papa eméritu”.

 

Ita agradese Bento XVI hodi reflete no moris ninia mensajen ikus ne’ebé nia entrega nu’udar gia ba dalan kuarezma nian: “Fiar iha karidada hamosu karidade”!
Amu-Papa iha nia surat tulun atu reflete relasaun entre fiar ni Karidade. Ita moris daudaun Tinan Fiar nian, Fiar ne’ebé lori ita ba enkontru ho Maromak. Amu-Papa hakerek: «iha moris sarani nia hahún la’ós desizaun étika ida ka ideia boot ida, maibé enkontru ho eventu boot ida, Ema ida, ne’ebé fó ba moris orizonte foun no ho ida-ne’e diresaun desiziva… Tanba Maromak mak hadomi uluk ita  (kf1 Jn 4,10), domin la’ós de’it ona ukun-fuan ida, maibé resposta ba don domin nian, husi nia Maromak mai hasoru ita» (Deus caritas est, 1).

Moris sarani tomak mak resposta ida ba Maromak nia domin. Resposta dahuluk mak fiar nu’udar simun totál maravilla no gratidaun nian ba inisativa divina ne’ebé oresede ita no konvida ita. No “sin” fiar nian marka inísiu istória amizade nian ho Na’i, ne’ebé hakonu no fó sentidu ba ita-nia ezisténsia. Maromka fali la kontente atu ita simu de’it ninia domin gratuitu. Nia la limita an de’it atu hadomi ita, maibé hakarak dada ita ba Nia, nakfilak ita ho modu kle’an atu bele dehan ho S. Paulo: la’ós ona ha’u mak moris, maibé Kristu moris iha ha’u (kf Gal 2,20).  Loke an ba ninia domin signifika husik Nia moris iha ita no lori ita atu hadomi ho Nia, iha Nia no hanesan Nia; nune’e de’it mak ita-nia fiar sai duni «badinas liuhusi karidade» (Gal 5,6) no Nia bele halo Nia uma iha ita leet (kf 1 Jn 4,12). “Ezisténsia sarani konsiste iha sa’e nafatin foho enkontru nian ho Maromak atu bele tuun fali, hodi lori domin no forsa mai husi Nia, nune’e bele serví ita-nia maun-alin sira ho Maromak nia domin rasik”.

Ba ita ne’ebé simu vokasaun espesiál konsagrasaun nian ba Na’i katak sá buat ne’e?

Iha artigu 11 ita-nia Konstituisaun nian ita lee katak “Kesi an ho votu Filha de Maria Auxiliadora halo ninian rasik moris kastu, kiak no obediente ne’ebéMaromak Nia Oan hili ba nia an rasik no ninia Inan hakohak ho dedikasaun tomak. Hodi hafoun nia karan ba Maromak ninia kapasidade atu hadomi, ninia hakarak atu soi, no posibilidade atu regula ninia moris rasik, nia sei hetan liberdade interiór. Nune’e nia bele dedika an di’ak liután, iha komuñaun ho irmán sira,atu Kristu nia domin rasik ba foin-sa’e sira  hela iha sira leet”.  La’ós ida-ne’e mak sa’e beibeik ba foho enkontru nian ho Maromak atu lori ba Nia ita-nia an loroloron, hodi hafoun ita nia sin no hafoin tuun fali, nakonu ho karidade, ho domin ne’ebé Nia haraik mai ita atu bele bá hasoru irmán sira no foin-sa’e sira? Maibé atu troka domin nian ho Nia bele akontese presiza la’o iha fiar no karidade… “Krize loloos – Madre jerál hakerek – mosu bainhira laiha karidade, bainhira ita la iha ona kapasidade atu narra Kristu iha relasaun komunitária sira… Ita presiza hadomi malu fali, halakon husi ita-nia komunidade vingansa ki’ik sira, murmurasaun sira, laran-moras sira ka hahalok aat seluk… nune’e de’it mak ita bele saii evanjelizadora, sasin kona-ba Maromak nia domin ba jerasaun foun sira.

Ho Institutu ita prepara an daudaun ba Festa Agradesimentu mundiál. Hamutuk iha fiar hodi hakat bá moris nakonu: ne’e mak lema ne’ebé ita-nia irmán sira husi Índia propoin mai ita tinan ida-ne’e, iha-ne’ebé Amu-Papa iha 2012 konvida atu ita hakat “odamatan fiar nian”, atu haree fali ita-nia istória fiar nian, hodi rekoñese ho gratidaun mistériu Maromak nia fidelidade no laran-sadia.  
“Mai ita moris preparasaun no selebrasaun festa Gratidaun nian nu’udar oportunidade signifikativa atu moris esperiénsia fiar ne’e nian nu’udar komunidade edukativa ne’ebé esprime ksolok, iha klima família nian, agradesimentu ba Na’i no agradesimentu ba malu entre FMA sira, leigu sira, foin-s’;e sira no família sira. Hamutuk ita fó liuliu espasu ba gratidaun, ba manifestasaun konfiansa no afetu nian ba Madre jerál, no ba ninia hahalok kontínuu orienta nian, akompaña nian no la’o uluk ba ita iha dalan fiar nain.” (Me. Emilia)

Ita iha ona Papa foun. Mai ita  hatudu ita-nia fidelidade  ba nia hodi moris tuir ninia hanorin sira.

Ita hamutuk nafatin iha komuñaun iha dalan fiar nian no iha selebrasaun ksolok Páskua nian!

Ho domin,

Ir. Paola Battagliola