Maromak nia Liafuan ohin konvida ita atu foti konxiénsia kona-ba radikalidade no ezijénsia misaun nian ne’ebé Maromak konfia mai ita. Maromak konvida ita ba kompromisu ida, aten-barani no koerente, ho konstrusaun “lalehan foun” no “rai foun”. Ne’e mak ita-nia misaun profétika.

Leitura dahuluk aprezenta mai ita profeta Jeremias nia figura. Profeta simu husi Maromak misaun ida ne’ebé lori xefe sira nia ódiu no Povu Jerusalém nia deskonfiansa: haklaken reinu Judá nia rohan. Jeremias kumpre misaun ne’ebé Maromak entrega ba nia, maski bele hamosu terus. Nia hatene katak misaun profétika la’ós konkursu ida popularidade nian, maibé sasin ida, ho lialoos no koerénsia, ba Maromak nia projetu sira.

Evanjellu reflete kona-ba misaun Jezús nian no ninia implikasaun sira. Evanjellu define Jezús nia misaun nu’udar “halo ahi lakan iha rai”, nune’e bele sunu egoízmu, moris-atan, salan no moris mundu foun – “Reinu”. Jezús nia proposta sei lori, divizaun. Basá ne’e mak proposta ezijente no radikál, ne’ebé sei provoka ema barak nia opozisaun; maski nune’e Jezús aseita enfrenta mate, atu bele realiza Aman Maromak nia planu no bele halo sai relaidade mundu foun.

Leitura daruak konvida ema sarani atu halai ho desizaun ba to’o moris nakonu – hanesan atleta sira ne’ebé la haree ba esforsu sira atu to’o iha meta hodi hetan vitória. Kristu – ne’ebé la monu ba buat fasil maibé enfrenta mate atu realiza Aman nia projetu – tenke sai sarani ida nia modelu no orienta ninia dalan.

Download