Dili – Animadora komunidade sira nian halo enkontru loron rua iha Dili husi 21 to’o 22 Marsu hamutuk ho provinsiál no konselleira sira. Sira-nia tema formativu mak “Don Bosco: edukadór ida ne’ebé akompaña ho estilu Sistema Preventivu” nian.  Fasilitadora ba enkontru ne’e mak irmán Paola (provinsiál), irmán Sebastiana no irmán Esmeralda. Irmán na’in tolu ne’e transmite fali buat ne’ebé sira simu iha enkontru Konferénsia Inspetoriál Ázia Orientál (CIAO) no Rejiaun Pasífiku Tasi-mane nian (South Pacific Region) husi loron 18 to’o loron 22 Agostu 2012 iha Yamanaka, Japaun durante semináriu kona-ba  “Akompañamentu tuir estilu salezianu”.

 

Aprezenta tiha tema irmán ida-idak ba reflete mesak hodi konfronta Don Bosco nia itineráriu espirituál ne’ebé hetan akompañamentu husi nia mamá, padre Calosso no padre Cafasso. Karakterístika ruma nia itineráriu espirituál mak: konfiansa iha Maromak, iha ema ne’ebé gia, iha formadór sira no entrega an ba sira, prontu atu obedese no tuir sira-nia matadalan.  Irmán sira mós reflete kona-ba oinsá estilu relasaun iha akompañamentu edukativu tuir Sistema Preventivu. Akompañamentu atu sai di’ak presiza uluknanai aprende iha eskola Mestre familiaridade nian: Jezús Kristu (kf Surat husi Roma, 1884). Nia mak modelu, gia, fonte inspirasaun nian, sinál Maromak nia laran-sadia. Hafoin akompañamentu iha finalidade ida importante liu: lori atu hasoru malu ho Maromak, fonte ksolok nian (kf Giovane Provdeduto-Introduzione). Ambiente di’ak ba akompañamentu mak espíritu família nian ne’ebé kria konfiansa. Segredu mak espíritu domin pedagójiku, ne’ebé konsiste iha imajina ema di’ak liu fali buat ne’ebé iha realidade.

Iha sharing irmán sira fahe kona-ba identikit akompañadora nian. Entre pontu sira ne’ebé sira subliña mak uluknanai vida espirituál kle’an no kapasidade atu halo leitura evanjélika realidade nian; kapasidade relasionál hanesan rona, laran metin, simu, respeita, valoriza ema sira, halo pasu dahuluk, hatudu ksolok no entuziazmu. Irmán sira mós dehan katak akompañadora tenke ema ida pasiénsia nian, haraik-an, valoriza resiprosidade, fó tempu no prioridade ba ema, iha transparénsia no prudénsia. Iha aprosimasaun ho ema ita presiza foti atitude Moisés nian iha ahi-klobor nia oin, iha-ne’ebé nia tenke hasai sandália sira tanba rai nia tau ain bá mak rai sagradu ida. Irmán sira mós evidensia katak ita hotu ema fraku no iha dalan, nune’e ita hotu presiza tulun.