Abertura “Jornada Mundiál Juventude”

Cracóvia (Polónia) – Papa Francisco iha kinta, 28 Jullu, partisipa iha serimónia resesaun “Jornada Mundiál Juventude” (JMJ) nian, iha parke Blonia nian/Cracóvia.

Joven na’in tolu hetan hilin atu fó saudasaun lais ba Amu-Papa: feto-raan ida husi Ázia, ida husi Europa Leste no ida husi Brasil, no nu’udar prezente sira oferese “kit peregrinu nian”.

Amu-Papa hahú nia diskursu husi tema Jornada nian, “Ksolok ba sira ne’ebé laran-sadia, basá sei hetan laran-sadia” (Mt 5, 7), hodi destaka katak Jezús rasik mak dehan ida-ne’e, Nia rasik mak konvida joven sira ba enkontru ida-ne’e. “Hamutuk ita sei halo Jornada ne’e Festa Jubilár tebes ida”.

Papa Francisco hateten katak furak tebes atu haree foin-sa’e barak mak hakohak moris; ida-ne’e kestaun ida ne’ebé kona ninia fuan husi kedas bainhira nia bispu. “Bainhira Jezús kona mane-klosan ida nia fuan, feto-raan ida nia fuan, sira iha kbiit atu halo hahalok ne’ebé boot tebes”.

Amu-Papa enfatiza katak laran-sadia eh mizerikórdia sempre iha oin foin-sa’e, basá fuan mizerikordiozu la akomoda an, maibé hatene bá hasoru ema seluk.

“Fuan mizerikordiozu hatene sai refújiu ba ema ne’ebé nunka iha uma eh lakon nia, hatene kria ambiente ida uma no família nian ba ema ne’ebé tenke emigra, iha kbiit ternura no kompaixaun nian. Fuan ida ne’ebé mizerikordiozu nakloke atu simu refujizadu no migrante. Dehan mizerikórdia hamutuk ho imi katak dehan oportunidade, dehan aban, kompromisu, konfiansa, abertura, ospitalidade, kompaixaun, mehi sira”.

“Joven sira ne’ebé tuur hakmatek”

Santu Padre hateten katak nia triste bainhira hasoru joven sira ne’ebé parese “tur hakmatek” molok tempu, joven sira ne’ebé deziste molok jogu, ne’ebé la’o ho oin triste, hanesan vida la iha folin. Joven sira-ne’e “xateadu” no “xatu”, basá sira halai tuir vendedór sira “iluzaun falsu nian” no vendedór sira-ne’e na’ok tiha ona husi sira buat ne’ebé di’ak liu.

Amu-Papa husu ba foin-sa’e sira se sira hakarak moris ida ne’ebé izola an eh moris ida ho forsa grasa nian,  nakonu. Se hakarak moris nakonu  dalan mak “Jezús Kristu”. Nia la’ós objetu ida, sasán ida sosa iha loja, maibé “Jezús Kristu mak don ida, prezente ida husi Aman”. Nia mak hatene fó paixaun loos ba moris, “Jezús Kristu mak ida-ne’ebé lori ita la kontente de’it ho buat uitoan no astu fó buat ne’ebé di’ak liu husi ita-nia an rasik: Jezús Kristu mak interpela ita, konvida no tulun ita atu hamriik hikas beibeik bainhira ita monu… Jezús nia liman lolo nafatin bainhira ita monu”.

Papa Francisco konvida joven sira atu harohan hamutuk ba Na’i: “Ita husu Na’i: lansa ami iha aventura mizerikórdia nian! Lansa ami iha aventura harii ponte nian no hamonu muru sira, lansa ami iha aventura tulun ema kiak (…) Ami hakarak simu Ita iha Jornada Mundiál Juventude nian, ami hakarak afirma katak vida sai nakonu bainhira moris hahú husi mizerikórdia: ne’e mak parte di’ak liu ne’ebé sei la hasai husi ami”.