Venilale – Retiru anual ba Postulante no Novisa ‘primeiro ano’ iha Komunidade Maria Auxiliadora – Venilale, husi loron 17-14 Jullu 2-16. Pregador ba retiru ne’e mak pe. João Gaspar SDB. Tema geral retiru ne’e nian mak  “Maromak nia  mizerikórdia”.  Miserikórdia Aman no Oan nian. Iha retiru ne’e fahe ba parte rua, dader konferensia husi Pe. Gaspar, Iha nia Konferensia nia koalia konabá Maromak nia Mizerikórdia hahu husi istoria salvasaun povo Israel nian. Povo Eleitu povo ne’ebé Maromak rasik tau matan, guia no akompaña sira maske dala barak sira rasik fila kotuk hodi adora Maromak falsu sira. Maibé Maromak kontínua hili no halo aliança ho sira tanba Nia naran mak “Mizerikórdia”.  Nune’e Maromak nia laran sadia  sai konkretu ita haree iha Nia Oan Jesus Kristu. Tuir Saun Paolu nia hanoin Jesus Kristu mak ida ne’ebé ita labele haree nia futar ilas maibé ita bele sente deit liu husi esperiensia fiar nian ne’ebé ita iha. Jesus Kristu iha nanis ona molok profeta sira, hanesan profeta Isaias dehan tempu sei to’o Maromak sei haruka nia Salvador ida mai.

               Iha tinan kotuk Amo papa Francisco hasai Bula Mizerikórdia atu ita bele halo esperiensia Maromak nia miserikórdia iha ita nia moris liu-liu iha mundu ohin loron. Meios no instrumentu atu ita bele esperiensia Aman, Oan nia mizerikórdia mak sakramentu rua Importante iha Kreda: Sakramentu Eukaristia no rekonsiliasaun. Sakramentu nu’udar lei no forsa ne’ebé lori ita atu komprende Maromak nia domin mizerikórdia. Ema primeiru ne’ebé moris tuir Maromak nia mizerikórdia mak Maria Virjen. Maria figura dahuluk simu Maromak nia konvite hodi hatutan domin ne’e ba Maromak nia povo tanba ho nia sim no nia virtude sira;

• Pureza: ho nia sim tau-an tomak iha Maromak
• Prudente: simu Maromak nia konvite no hili buat ne’ebe diak liu
• Haraik-an: dependensia total ba Maromak, ba nia bensaun no grasa hotu.
• Fiar: ho kbiit no kapasidade entrega-an tomak ba Maromak no husik Maromak forma nia
• Devosaun : ne’ebe Nia hatudu liu ninia orasaun, liu-liu orasaun Magnificat: Maria fali rai buat hotu iha nia laran. Hodi tersu lorloron, nia lori ita ba Nia Oan Jesus
• Obediente : Maria halo tuir buat hotu ne’ebé Maromak husu ba nia
• Pobreza : Simplisidade iha nia fuan; la tau-an ba sasan mundu nian
• Pasiensia; simu todan hotu maske nia sente la soin.
• Mizerikórdia no karidade; Nia hatudu karidade hodi lori tulun no ksolok ba nia feto maluk Sta. Isabel no hodi nia intervensaun iha festa kasamento iha Kana
• Fuan triste : Wainhira nia rona Simão nia liafuan “ surik ida sei sona borus o nia fuan” no wainhira haree nia Oan mate iha kruz.

Iha konferensia  loraik nian , Me. Cecilia del  Mundo FMA, tulun sira  atu reflete Madre Maria D. Mazzarello nia esperiensia kona ba Maromak nia Domin mizerikordiosu no oinsa nia sai instrumentu laran sadia nian ba irman sira no ba menina sira.  Nune’e ho reflesaun hirak ne’e tulun tebes sira, halo sira admira ba Maromak nia mizerikórdia boot, aas  klean no rohan laek ne’ebe labele imajina. Tanba Maromak nia domin ne’ebé universal – ba ema hotu. Ho ida ne’e sira brani hateke ba-an ho matan fiar nian hodi empenha-an iha moris konkretu ho projetu moris nian ne’ebé sira ida-idak hakarak atu moris iha tinan ida ne’e mak:

1. Buka moris iha Maromak nia laran sadia liu husi rona no pratika Maromak nia Liafuan
2. Konsiente liutan ba Maromak nia laran sadia liu husi Sakramentu rekonsiliasaun nian.
3. Aprende atu hateke ba ema seluk ho matan positivu
4. Hakas-an atu fó no simu perdaun
5. Buka atu halo Maromak nia mizerikordia nabilan iha Komunidade no iha apostuladu.

Ikus Pe. Gaspar nia mensagen ba sira, nia dehan:  Ho orasaun nakfilak buat hotu ne’ebé todan ba kaman nune’e kontínua halo viajen ho korajen , laran metin  iha  Maromak nia mizerikórdia.

(Isabel Soares)