Iha ne’ebé iha Don Bosco nia oan sira iha-ne’ebá Maria Ausiliadora mós iha, no loloos  to’o uluk hodi loke dalan ba oan sira. Bainhira haree devotu sira Ausiliadora nian lori nia ba hale’u koléjiu Fatumaka (úniku Santuáriu dedika ba Auxilium Christianorum iha Timor -Leste) ho banda muzikál alterna ho Ave-Maria sira eh mós bainhira nia hale’u parókia Comoro, Maria Tulun-Nain maka vizita ita hodi tulun ita ho ninia prezensa laran-luak nian. Don Bosco asegura ba ema hotu ne’ebé hadomi Maria katak nia mai horik iha sira-nia leet, la’o iha família ida nia uma-laran, iha komunidade no nia nafatin pronta atu tulun se ita husu nia atu lolo liman ba ita. Tanba sá? Tanba Inan ida lakohi nia oan sira, ne’ebé Jezús entrega ba nia husi krús tutun lakon. Nia hakarak sira hotu ba to’o Jezús, Ida-mesak ne’ebé bele soi husi aat.

 

Ita haksolok tebes tanba iha Inan Tulun-Nain. Ita hakbesik nafatin nia no “ita sei hatene saida maka milagre”.

Ita iha razaun atu haksolok mós basá horisehik Família saleziana simu mós prezente diakonadu Placido Freitas SDB nian, iha loron dedika ba Maria Ausiliadora. Atu Maria sai nafatin Inan, Mestra no Mata-dalan iha dalan vokasaun saleziana nian