Sidade Vaticano – Iha tuku 20hs12min loron 13 Marsu 2013 (Italia),  protodiákonu Jean-Louis Tauran haklaken fórmula famoza:

“Annuntio vobis gaudium magnum: habemus Papam!”

“Eminentissimum ac reverendissimum dominum, dominum, Georgium Marium Sanctae Romanae Ecclesiae Cardinalem Bergoglio, qui sibi nomen imposuit Franciscum.

Kardeál Arsebispu Buenos Aires nian, Jezuita Jorge Mario Bergoglio, tinan 76 anos mak susesór 265 Pedro nian, hodi asume naran Francisco nian. Nia eleitu iha eskrutíniu da-5 loron daruak Conclave nian.

Iha tuku 20h23min husi balkaun sentrál Bazílika S. Pedro, Amu-Papa Francisco haklaken liafuan sira-ne’e:

 

“Maun-alin no bii-alin sira, bonoite! Imi hatene katak devér Conclave nian mak fó bispu ida ba Roma. Parese katak maun-alin kardeál sira ba foti nia iha kuaze mundu nia rohan. Maibé, ita iha ona ne’e! Ha’u agradese imi, ba komunidade diosezana, hodi simu ninia bispu.   Obrigadu! Uluknanai, ha’u hakarak halo orasaun ida ba ita-nia bispu eméritu Bento XVI. Ita hamutuk reza ba nia, atu Maromak haraik bensan ba nia no Na’i-Feto proteje nia (tuir orasaun Ami Aman, Ave Maria  no Glória). No agora ita hahú dalan ida-ne’e bispu no povu, dalan kreda Roma nian, ne’ebé prezide iha karidade kreda tomak. Dalan ida Fraternidade, domin, konfiansa nian entre ita.

Ita reza nafatin ba malu. Ita reza ba mundu atu bele iha fraternidade.

Ha’u hein atu dalan kreda nian ne’ebé ohin ita hahú, iha-ne’ebé kardeál vigáriu ne’ebé iha ne’e sei tulun ha’u, soi fuan barak ba evanjelizasaun iha sidade furak ida-ne’e.

Ha’u hakarak fó bensan, maibé molok ha’u husu favór ida ba imi, ha’u husu atu imi harohan ba Na’i: povu nia orasaun ne’ebé husu bensan ba ninia bispu. Ita halo iha silénsiu imi-nia orasaun ida-ne’e mai ha’u!”

Agora ha’u fó bensan, ba imi no ba mundu tomak, ba mane no feto hotu vontade di’ak nian.(Bensan Urbi et Orbi).

Maun-alin no biin-alin sira, ha’u tenke husik imi. Obrigadu barak ba akollimentu! Reza mai ha’u no até breve! Ha’u sei haree imi iha tempu badak: aban ha’u hakarak ba harohan iha Na’i-Feto nia ain, atu bele tau matan ba Roma tomak. Bonoite no dekansu di’ak!

Fó tiha bensan Urbi et Orbi ba ema hotu iha Prasa S. Pedro no sira ne’ebé akompaña nia liuhusi meiu komunikasaun sosiál, nia retira.

Padre Lombardi, portavós Vaticano nian konfirma katak Misa Inaugurasaun Ministériu Petrinu sel halo iha loron 19 Marsu, festa S. José nian, tuku 9.30 0ras Roma nian.
Nia mós konfirma katak Misa Enserramentu Conclave nian sei halo iha kinta iha Capella Sistina. Iha sesta, tuku 11 dadee, sei iha audénsia ba koléjiu kardeál sira-nian iha sala Clementina. Iha sábadu tuku 11, Amu-Papa Francisco sei iha audiénsia ho jornalista no média ne’ebé halo kobertura ba Conclave.