Dili – Inspetoria FMA TIN iha fulan Setembru 2015 simu prezente ida husi Madre Jerál: Ir Mariarita di Leo nu’udar profesora lia-italianu, lia-inan Fundadór sira-nian. Ir Mariarita halo kursu italianu ba formande sira (aspirante, postulante no novisa sira), ba Irmán junior no Irmán perpétua balun. Depoizde fulan sanulu, oras-ne’e Ir Mariarita simu fali obediénsia foun atu bá fali Itália hodi hala’o knaar iha komunidade ki’ik ida iha periferia Súl Itália nian. Kursu ne’e remata ho ofisina ki’ik ida teatru nian, iha-ne’ebé Ir Mariarita prepara ba kursista sira Dili nian no aprezenta ba audiénsia Irmán sira iha loron ikus sira-nia retiru anuál nian, 16 Jullu 2016. Inspetoria mós aproveita okaziaun ne’e atu hato’o agradese no iha kalan komunidade novisiadu mós hato’o agradesimentu espesiál ba nia.

Tuirmai ne’e, ami hato’o mós lia-menon Ir Mariarita nian ne’ebé nia hato’o ba hotu-hotu prezente iha momentu agradesimentu ne’e:

«Ha’u horik iha silénsiu ba fulan barak, hanesan Isabel nia laen, Zacarias. Ne’e mak esperiénsia ida grasa boot nian. Ha’u-nia esperiénsia ne’e mak viajen espirituál ida aleinde fíziku. Bainhira vigária jerál telephone ha’u no bolu ha’u ba Roma, ha’u dehan ba Vigária: “Ha’u halo buat ruma aat?” Nia dehan mai ha’u: “Lae, La Madre hakarak ko’alia ho ó”. Madre husu mai ha’u ha’u buat boot ida. Ha’u nakonu ho ha’u-nia atividade pastoral. Ha’u tenke husik foin-sa’e sira ne’ebé la halo ezame Estadu nian. No buat hotu akontese iha la to’o semana ida nia laran. Bainhira ha’u ho Madre foti tempu atu reza, ha’u sente katak Na’I sei la husik ha’u mesak basá ha’u ema kiak liu no ki’ik-oan no iha laran-ta’uk maka’as. Bainhira aviaun semo, ha’u sente terus ida ne’ebé uluk ha’u nunka sente. Fuan nakfera iha rua; agora ha’u hanoin ha’u sei sente terus hanesan. Bainhira ha’u to’o iha-ne’e, ha’u halo jestu ida ne’ebé, la hatene se ema hotu komprende:  ha’u rein rai ne’e, nu’udar obediénsia ba Na’i, basá obediénsia ida mesak – maski ema hanorin buat barak – ema halo ba Maromak. Basá hodi rein rai ida-ne’e, ha’u saran an ba rai ne’e, iha di’ak eh iha aat. La’ós simles de’it ha’u-nia moris iha ne’e, basá ha’u-nia fíziku la reajen hanesan ha’u hanoin, maibé ha’u komprende buat ne’ebé padre hateten ohin dadeer: ‘buat hotu mak grasa’. Ha’u fila ba uma ho rikusoin boot ida. Ema hotu ne’ebé ha’u hasoru ha’u fó ha’u-nai fuan pedasu ida. Ha’u simu husi sira-nia fuan pedasu ida. No agora ha’u sente katak ha’u la’ós ona ema hanesan, tanba la iha ona fronteira jeográfika sira. Ha’u hakerek surat ida ba komunidade ida-idak no Ir Joanna tradús iha tetun. No ha’u hakarak atu imi lee ba Irmán sira iha komunidade ne’ebé ha’u la konsege kumprimenta. Ha’u aprende atu hateke ba lalehan. Iha Timor, lalehan furak liu, furak mós bainhira la haree fitun sira no fulan maibé iha. Ha’u deskobre ho fuan, la’ós ho ulun, katak lalehan ida de’it, fulan ida de’it, ne’ebé Nabila iha ita-nia oin mutin no metan no hanesan iha mundu tomak. Ami-nia Mestra (novisa nian), hateten buat ida furak liu: “Novisa sira bainhira imi halo profisaun, ita hotu sei iha raan ida de’it, raan salezianu”. Filha de Maria Auxiliadora ida-idak, labele taka metin an iha ninia kultura, tanba iha filiasaun ida boot liu mak ida karizma nian. No ha’u komprende buat ne’e iha ne’e ho imi.

Inspetora foun fó tiha ona mai ha’u obediénsia liuhusi skype. Ba dala uluk mak ha’u moris esperiénsia ida-ne’e. ha’u sei bá iha komunidade ki’ik-oan ida ho Irmán na’in tolu. Itália hanean botas ida. Ha’u sei bá iha ninia sola. Ne’e mak periferia periferia sira-nian. Iha bairru ne’ebé ha’u-nia komunidade hela bá, iha mafia, hanaran Sacra Corona Unità. Inspetora husu ha’u atu serbisu ho imigrante sira. Família barak mak ho roo tama iha ami-nia tasi ibun sira. Ha’u hatán kedas “sin”, no nia hakfodak. Nune’e ha’u dehan: “Ir Mara, ó hatene, ha’u husu grasa ida ba Maromak, katak, se bainhira ha’u fila iha Itália, di’ak no salva, tanba prekariedade moris nian ne’e boot, entaun ha’u hakarak moris esperiénsi iha periferia ho ema kiak, hodi husik buat hotu ne’ebé ha’u harii. Maromak halo grasa barak mai ha’u, tinan ne’e.

Ha’u dehan buat ikus ida: mai ha’u fulan mak símbolu furak liu ida. Ha’u partisipa novena [Maria Auxiliadora] nian hotu ne’ebé parókia halo hodi bá iha gruta Na’i-Feto nian. Ha’u nota buat ida inkrivel. Loron 24, fulan nafatin nakonu. Mai ha’u, Maria mak fulan. Nia leno ita-nia ain-hakat sira bainhira selebra loron 24. Ha’u sente nia besik duni ha’u-nia moris, hanesan Padre ohin dadeer hatetne. Nia hanesan hein ha’u. Iha realidade akontese nune’e: Na’i-Feto iha novisiadu mak Reitór-Mor (Pe. Egidio VIganò] entrega mai ami; ha’u mak foti, ha’u hamoos nia husi rai-rahun no ha’u tau nia iha kapela iha loron 24 Maiu 1995. Tempu ne’ebá ha’u novisa sakristán. Ha’u sente katak nia prepara dalan mai ha’u.

Ha’u agradese imi, Irmán sira. No agradesimentu ne’e ha’u lee, tanba ha’u lakohi haluha buat ida: “Irmán doben sira, ha’u reza ba imi atu hanesan Jezús, Maromak-Ema, ne’ebé la ta’uk atu hanoin, atu  para, atu kona no hadomi ho fuan no ho liman sira. Ha’u hanoin katak presiza liu ida-ne’e iha rai furak ida-ne’e. Ita-nia moris saran ba foin-sa’e sira-nia vida, imi-nia moris hatene fó isin  liután ba karizma salezianu iha periferia reál no ezistensiál sira Timor-Leste nian, hahú husi imi-nia komunidade sira.

Ha’u agradese imi Irmán perpétua sira hamutuk ho votus espesiál ida: atu imi hatene sai samaritana ba malu, atu imi hatene kona foin-sa’e sira nia moris no Irmán sira iha formasaun ne’ebé hateke ba imi nu’udar ezemplu atu tuir. Ba imi, Irmán ki’ik-oan sira no foin-sa’e sira iha formasaun ha’u-nia agradesiemntu boot hamutuk ho votus halo ho fuan. Atu imi hatene halo dalan liberdade interior nian nune’e fó fatin liután ba Na’i moris nian. No ha’u hakarak imi ida-idak sente ha’u-nia domin, ha’u-nia orasaun kiak no ha’u-nia lembransa. Ha’u hanoin katak ha’u husik hela ha’u-nia fuan nia pedasu ida iha Timor, no se mak hatene, karik loron ida ha’u sei fila fali atu foti.

Hakohak boot ba madre sira hotu!

Ir Mariarita di Leo»