Dili – Depoizde Pe. Virgílio do Carmo da Silva eleitu nu’udar bispu ba dioseze Dili iha fulan Fevereiru 2016, ohin finalmente, Vizitadoria S. Calisto Caravario ITM, hetan ona ninia provinsiál foun. Prosesu hahú ho dixernimentu iha rejiaun Timor Leste no Indonesia, no ho Maromak nia grasa, ohin ho prezensa Pe. Clement Vaclav, bele tau iha vizitadoria joven ne’e nia oin, Pe. Apolinário Maria Hornai Neto, nu’udar superiór dalimak.

Pe. Vaclav, iha ninia omilia durante selebrasaun eukarístika hodi komenta va leitura Evanjellu nian hateten katak “tuir no fó sasin kona-ba Jezús mak ita-nia misaun dahuluk”. Ita nu’udar Jezú snia dixípulu, hodi Espíritu Santu nia matadalan, ita simu bolun atu fó sasin kona-ba Aman nia domin loron ba loron, liuliu iha foin-sa’e sira iha ita-nia eskola sira, iha sentru treinamentu vokasionál sira, parókia sira no grupu juveníl sira, Amu Vaclav hateten.

Vizitadoria ITM (Indonesia no Timor-Leste) mak komunidade provinsiál ida dinámika namkari iha nasaun rua Timor Leste no Indonesia ho salezianu na’in 200.

Prezente iha selebrasaun ne’e Família Saleziana tomak, inklui provinsiál FMA no FMA sira no mós marka prezensa Amu-Bispu Virgílio do Carmo da Silva SDB. Provinsiál foun, Pe. Apolinário iha ninia lia-menon agradese ba membru Família Saleziana ida-idak prezente iha rai rua ne’e, ne’ebé hatudu domin no apoiu ba ninia knaar foun. Nia husu atu Família Saleziana tomak kontinua kari fini karizma nian ne’ebé misionáriu sira lori mai ita-nia rain sira. Ko’alia kona-ba leigu sira nia kolaborasaun ba misaun saleziana, SDB sira fó mós sira-nia rekoñesimentu no apresiasaun ba mestra antigun ida ne’ebé serbisu ho salezianu sira iha eskola pre-sekundária Baucau. Nia mak Señor Alcino Guterres, ne’ebé oras-ne’e moras todan iha HNGV, Dili, maibé hetan reprezentasuan husi nia oan sira.

Iha okaziaun ne’e mós amlulik salezianu na’in tolu selebra sira nia aniversáriu tinan 25 nu’udar salezianu: Pe. Ilídio Correia, Pe. Yohanesa Laba Tolok no Pe. Justiniano Sousa.