Venilale – Komunidade Maria Auxiliadora loke expo misionáriu iha loron 3 Jullu, ho objetivu atu bele fó suporta ba serbisu misionáriu nian ba Pe. Adolfo SDB no Ir. Ursula FMA ninia misaun. Nune’e ami ho ksolok prepara sasan kiik no simples, hahú husi orfan sira, sentru oratório Uai-oli, Uai-Haco, infância misionária no Pre-aspirante. Razaun  ne’ebé dudu maka’as hodi realiza atividades ne’e mak hanoin ba ema seluk nia susar maski la haree maibé espíritualmente sente hola parte no tempu hanesan tulun mós  labarik no foinsa’e sira atu hatene fó ba ema seluk ne’ebé kiak liu maski sira rasik mós ki´ak. Material ba expo nian husi labarik sira nia kreatividade rasik. Hanesan São João Paulo II, hanorin iha Ensíklika Redemptoris Missio:  “Husi ita-nia pobreza fó” no hanorin sira atu iha fuan misionáriu no  domin ba rai misaun. Iha esperiensia faan no sosa ida ne’e hetan vantajen di’ak tanba ema hotu bele fó ninia kontribuisaun liu husi osan oituan ne’ebé sira iha, ami agradese mós ba Komunidade MM ne’ebe fó ninia apoia tomak hamutuk ho estudante hotu mai, ba seminaristas sira no ba hirak ne’ebé konvite lato’o maibé hetan partisipasaun máxima. Ami haksolok ho sira no ksolok ne’e nakfilak ba gratidaun.

Iha okaziaun ne’e ami mós haksolok tanba Amu-bispu Virgílio do Carmo halo nia misa agradesimentu nian iha Venilale, nune’e husi oportunidade ne’e molok nia ba fali Dili, nia liu iha fatin expo nian no vizita.

Hotu tiha expo amo Adolfo mós mai, nune’e Ir. Esmeralda-Diretora da casa konvida amo ba iha Orfanato S. Domingos Savio, han hamutuk ho ami no fó mós bensaun ba labarik  sira ida-idak.

Ikus gratidaun partikulár ba Irmán na’in 7 iha komunidade ne’ebé hatudu komuñaun fraterna hodi anima expo misaun ida ne’e.

(Agata Freitas)