Venilale – Akontesimentu boot tolu ne’ebé akontese iha parokia Venilale mak : Inagurasaun kapela UAI-OLI, iha ne’ebé  Amo Dom Bazilio Do Nasimento mak selebra misa inagurasaun kapela ne’e, iha loron 30 de Junho de 2016. Maski ho klima ne’ebé la diak tebes maibe Bibi-Atan diak ne’e, prontu ba to’o nia povu sira leet hodi selebra misa, haksolok hamutuk ho povu UAI – OLI.  Atividade furak ne’ebé hetan partisipasaun masimu tebes husi sarani Venilale hodi prepara-an atu selebra festa mahein Parokia nian (SAGRADA CORAÇÃO DE JESUS) ne’ebé lolos festa ne’e monu iha loron 2 fulan Junho, maibe bertepatan ho Amo Virgilio ninia misa agradesimentu nian, nune’e festa rua ne’e halo hamutuk deit. Husi equipa Pastoral Parokia nian, deside atu fo formasaun  kona ba dokumentu LAUDATO SI. Formasaun ne’e, laos deit ba familia maibe mos ba estudante hotu iha Venilale nian. Liu ida ne’e,  estatua JESUS SAGRADO CORAÇÃO  nian lao haleu suku 8 Venilale nian durante loron 18 nia laran. Estatua ne’e hela duni hamutuk ho povu iha sira leet.

Akontesimentu rua ne’ebé halo hamutuk ne’e hetan partisipasaun masimu tebes husi sarani sira. Misa agradesimentu Amo DON VIRGILIO no Solenidade SAGRADO CORAÇÃO DE JESUS. Solenidade Sagrada Coração de Jesus, ne’ebé lolos monu iha loron 2 fulan Junho maibe amo paróko no ninia equipa sira decide atu selebra hamutuk iha misa agradesimentu ba amo Dom Virgilia, nu’udar Bispu no nu’udar Venilale anang. Akontesimento ne’e realiza iha loron 02 fulan Julho 2016. Iha dader tuku 06 deit, sarani Venilale prepara-an atu simu Dom Virgilio. Grupo jovens hamutuk halo prosesaun motorizada hodi simu iha Fatumaka no sarani tomak ho entuziasmu hein iha edifisiu PNTL nian, hafoin akompaña Bibi-Atan ne’e ba to’o igreja.

Iha tuku 11.00 oras Timor-Leste, hahu selebrasaun Eucaristia ne’ebé solene tebes husi Amo Dom Virgilia, hamutuk ho co-celebrante amululik lubuk ida no representante Bispu Baucau nian mos. Iha homilia, Amo Virgilio hato’o ninia sentimentu gratidaun nian:  hodi dehan : sentimentu ne’e dudu hau atu agradese ba moris ne’ebé hau simu, agradese ba esperiensia hahu husi kiik to’o sai Nailulik, no ikus agradese ba vokasaun ne’ebé Maromak iha mai hau. Kona ba vokasaun ne’e, amo dehan, dala barak hau husu perguntas, tansa mak Maromak hili hau? Tanba matenek, lae. Tanba bonitu, ne’e mos lae. Resposta mak tanba DOMIN. Domin ne’e ita bele sente liu husi fuan. Ho motivu ida ne’e, ohin ita hanoin kona ba festa ne’ebé ita selebra daudaun. Selebra Jesus Nia fuan ne’ebé domin laiha rohan.

Iha momentu agradesimentu nian, amo Dom Virgilio, hamutuk ho luirai suku 8 Venilale nian husik manu-pombu nu’udar sinal unidade no dame iha rai Venilale. No fuan agradese ba Maromak Nia Espíritu ne’ebé horik iha amo Dom Virgilio houdi hili nia sai nu’udar bibi-atan atu bali Na’i nia bibi sira la’o iha luhan ida deit. Remata selebrasaun ne’e, iha konfraternizasaun hamutuk ho sarani tomak iha Seminario Beato Filipe Rinaldi. Haksolok hamutuk, no bele aizisti mos alunus ETV feto no mane sira nia kapasidade atu servi ho estilu sira hanesan iha restorante. Solene tebes momento furak sira ne’e.

(Adriana – 3 Ano Alimentar)