Liturjia domingu ne’e nian buka define dalan atu hetan moris rohan-laek. Testu sira ohin nian hateten katak moris rohan-laek sei hetan de’it iha domin ba Maromak no ba maluk sira.

Evanjellu sujere katak moris nakonu ida-ne’e la mai husi kumpre ritu determinadu ruma, maibé husi domin. Nu’udar ezemplu, Evanjellu aprezenta figura samaritanu ida-nian, ne’ebé tuir ema judeu sira, nia mak infiél ida, ereje ida, maibé nia hatene lolo liman ba maluk ne’ebé latan iha lurón ninin. “Bá no halo hanesan” – Jezús dehan ba ema ida-idak ne’ebé hakarak hetan moris rohan-laek.

Leitura dahuluk reflete, liuliu kestaun domin ba Maromak, Nia konvida ema fiar-na’in sira atu halo Maromak sai sentru moris nian no hadomi nia ho fuan tomak. Oinsá? Hodi rona ninia liafuan iha fuan laran no la’o tuir ninia ukun-fuan sira.

Iha leitura daruak, Paulo aprezenta knananuk ida ne’ebé propoin Kristu nu’udar referénsia fundamentál, nu’udar sentru iha-ne’ebé istória no fiar-na’in ida nia moris harii bá.  Testu maski haliis uitoan husi tema leitura rua seluk, nia mak katekeze ida kona-ba sentralidade Kristu nian. Se Kristu mak sentru iha-ne’ebé buat hotu sei harii, ita presiza rona Nia ho atensaun no halo atu domin ba Maromak no ba maluk sira sai ezijénsia fundamentál ida iha ita-nia dalan.

Download