Iha katekeze espesiál ba Tinan Mizerikórdia nian, Amu-Papa destaka valór servisu nian ba maluk sira: “ema ne’ebé la moris atu serví la serve atu moris”.

RV – Papa Francisco hasoru malu ho sarani sira iha Prasa S. Pedro iha kinta, 30 Juñu, ba audiénsia jubilár, ho katekeze espesiál iha Tinan Mizerikórdia nian.

Pontu-xave Pontífise nia reflesaun mak importánsia moris iha mizerikórdia ba maluk sira, valór servisu ba maun-alin sira. Amu-Papa reforsa katak “mizerikórdia la’ós liafuan abstratu ida, maibé estilu ida moris nian” sai eh la sai mizerikordiozu. Liafuan mizerikórdia mate se la akompaña ho obra sira.

Download

“Ema sira ne’ebé liu, bá oin iha moris hodi la haree ema seluk nia nesesidade espirituál no materiál sira, mak ema sira ne’ebé liu hodi la moris, ema sira ne’ebé la serví ema seluk. Hanoin didi’ak bá: ema ne’ebé la moris atu serví, la serve atu moris”, Amu-Papa hateten.

Papa Francisco fó hanoin katak, iha moris loroloron, iha situasaun barak atu kona ho liman rasik ema ne’ebé kiak no presiza liu nia nesesidade sira. Natón de’it iha atensaun partikulár ida no akolle maluk nia sofrimentu ida-ne’e ba an rasik. “Mizerikórdia iha matan atu haree, tilun atu rona, liman atu hasae…”.

Pontu seluk Papa Francisco aborda iha katekeze mak ninia viajen ba Armênia no vizita ne’ebé nia sei halo iha fulan oin sira iha Geórgia no Azerbaijão, hotu iha rejiaun káukazu. Motivu vizita nian ba rejiaun ne’e mak valoriza abut sarani antigu no enkoraja esperansa no fiar.

“Nu’udar erma sarani sira, ita simu bolun atu reforsa komuñaun fraterna entre ita, atu fó sasin Kristu nia Evanjellu no atu sai fermentu ba sosiedade ida ne’ebé justa no solidária liután”.