Venilale – Hodi selebra Solenidade Santu Apóstlu Pedru no Paulo nian (29/6/2016), komunidade hamutuk nu’udar familia ida deit selebra festa Agradesimentu ho tema : “AGRADESE BA DOMIN MIZERIKÓRDIA MAROMAK NIAN”. Agradesimentu ka gratidaun mak sentimentu rekuñesimentu nian, emosaun atu hatene kuandu ema ida halo hahalok diak, tulun, halo favor. Gratidaun mak sentimentu ida hakarak atu agradese. Gratidaun ne’e valor ida hanesan valor sira seluk: domin, amizade, fidelidade nst. Gratidaun laiha tempu, laiha oras, maibe gratidaun tenke presente nafatin hodi rekoñese buat ruma ema seluk halo: AGORA.mak Gratidaun ba Maromak ba esperiensia sira, ba difikuldade ne’ebé supera, ba amizade, ba konfiansa, ba momentu sira susar maibe ita konsege haree ho matan seluk.

Sentimentu ida ne’e, mosu ho spontanidade housi alunus, profesores, kolaboradores, madres hodi agradese ba malu liu housi jestu kiik sira ne’ebé ida-idak hatudu iha moris loro-loron nian, no liu-liu halo komitmentu ida hodi dada naran atu reza ba ema ne’ebé ita dada kona nia naran. Atividade ne’e halo durante besik fulan ida. Molok selebra festa gratidaun ne’e, mosu inisiativa spiritual housi madre Floriana atu prepara selebrasaun penitensial ida hamutuk ho menina asrama. Nune’e iha kalan molok, halo hamutuk selebrasaun penitensial no taka ho adorasaun Santissimu sakramentu.

Puncak ba festa gratidaun ne’e realiza iha loron boot solenidade santu Apóstlu nain rua nian, iha ne’ebé ami hahu ho Eucaristia Santa housi padre Abrão nu’udar kapelaun iha komunidade ETV-Mazzarello. Selebrasaun ne’e sai solene tanba hodi hanoin santu nain rua nia sasin fiar nian, iha ne’ebé sira rua fó-an ba mate tan Kristu, la tauk atu haklaken, maski hetan terus no susar  oi-oin, nune’e ohin loron kreda bele hamrik metin. Depois de misa iha divertimentu ou apresentasaun talentu housi turma ida-ida, profesores, no ikus liu housi madre sira. Hodi kompleta festa ne’e ikus nian taka ho konfraternizasaun.

(Yashinta Hoar)