RV – Papa Francisco nia katekeze, iha kuarta, 22 Juñu, sentraliza iha testu Evanjellu nian ne’ebé haktuir milagre kura leprozu nian. Hodi aplika ba ohin loron, Amu-Papa destaka katak ita labele ta’uk atu kona ema kiak no ema eskluidu.

Lepra, iha époka ne’ebá, ema hanoin nu’udar malisan ida, impureza ida no, tanba ne’e, ema leprozu tenke hela dook, dook husi temple, husi Maromak no husi ema sira. Iha Lucas nia narrasaun, leprozu la aseita lei sira-ne’e no tama iha sidade, hodi buka Jezús.

Download

 “Haree Jezús, nia monu ho oin ba rai no husu ba nia: ‘Na’i, se iha hakarak, it abele hamoos ha’u”. Papa Francisco esplika katak, ho jestu ida-ne’e, ema rekoñese Jezús nia kbiit. No ninia fiar dehan ba nia katak Jezús bele kura nia. Orasuan ne’e hatudu katak, ho Jezús natón de’it liafuan uitoan, maibé akompaña ho konfiansa iha ninia kbiit no laran-di’ak.

“Saran an ba Maromak nia signifika konfia iha ninia mizerikórdia infinita”, Amu-Papa dehan, ne’ebé halo revelasaun ida ba sarani sira: molok toba, nia reza Ami-Aman lima, hodi hanoin Jezús nia kanek lima, no husi Jezús atu purifika nia.

Bainhira ema moras-lepra ne’e husu purifikasaun, Jezús halo buat ida ne’ebé labele halo: lolo liman no kona leprozu ne’e. Ho ida-ne’e, Amu-Papa halo komparasaun ida ho buat ne’ebé akontese ohin loron.

“Dala hira mak ita hasoru ema kiak ida no, maski ita laran-luak no sente kompaizaun, ita la kona sira. Ita oferese osan ida, maibé ita evita atu kona nia liman. Ita haluha tiha katak ida-ne’ebá Kristu nia isin! Jezús hanorin ita atu keta ta’uk kona ema kiak no eskluidu, basá Nia horik iha sira. Kona ema kiak bele purifika ita husi ipokrizia no halo ita preokupa ho sira-nia eskluzaun.”

Papa Francisco aproveita atu aprezentaa foin-sa’e ruma ne’ebé hamutuk ho nia iha tribuna fatin nia realiza katekeze. Sira ne’e joven refujiadu sira ne’ebé ohin partisipa iha audiénsia jerál.

 “Ema barak hanoin katak di’ak liu sira hela iha sira-nia rain, maibé iha-ne’ebá sir aterus. Sira ita-nia refujiadu sira maibé ema barak konsidera sira eskluidu. Halo favór, sira ita-nia maun no biin-alin sira!”