Laga – Madre Alma Castagna halibur Juniores lokál (Laga, Venilale no Fuiluro) hodi fó formasaun iha loron 18 Juñu 2016. Tema ne’ebé Madre lori mak “Moris iha komunidade tuir Don Bosco no Madre Mazzarello nia esperiénsia”.

            Molok konferénsia ami hahú ho orasaun iha ne’ebé prepara ami hodi haree ba komunidade nu’udar ilas domin Maromak nian no fatin atu ema halo esperiénsia kona-ba domin. Iha reflesaun madre dehan komunidade mak fatin atu komprende estilu moris komunitáriu ne’ebé Don Bosco hakarak propoin ba Salezianu sira no mós ba FMA, ita presiza hanoin ba destinatáriu previlijiadu misaun nian: foinsa’e kiak sira. Tuir Don Bosco nia mehi mak oinsá kria ambiente sira ne’ebé sente klima família nian, iha ne’ebé ema sira moris iha komuñaun,  ambiente sira iha ne’ebé bele hasoru Maromak liu husi ema sira nia domin. Iha kontestu Timor labarik barak mak moris iha perigu laran (inan aman divorsiu / mate) presiza ema seluk nia tau matan, nune’e la’o ho Don Bosco be la halo teoria ho ideia sira ne’e, maibé tranzmite konteúdu sira ne’e liu husi esperiénsia komunitária.

            Relasaun ne’ebé Don Bosco kria iha komunidade, la bazeia de’it ba aspetu umanu, maibé tau abut iha aspetu espirituál; nia dehan “tenke iha karidade atu suporta malu no korrije malu … karidade hodi la ko’alia iha kotuk-kotuk kona-ba ema ida nia aat”.

“Iha Mornese Maria Mazzarello ho nia komunidade dahuluk sira pratika fraternidade forte liu, tanba la’ós ema ida de’it nia intuisaun, maibé sira hahú nu’udar grupu”. Nune’e ema hirak ne’ebé tama iha ona esperiénsia iha grupu ruma nu’udar Oratóriu ka naran grupu ruma fasil mós atu moris hamutuk iha komunidade. Iha ne’e Madre Mazzarello simplifika buat barak: moris orasaun nian, relasaun entre autoridade no obediénsia; buat ne’e favorese klima lialos nian, transparénsia, laran-metin ba malu. Sira iha domin ba madre Mazzarello no sira sente katak Madre Mazzarello nia domin “haleu” sira. Sira hotu sente nu’udar oan ne’ebé  nia hadomi, estima no valoriza.

            Madre Alma mós dehan katak ita-nia moris fraterna no espíritu família reflete liuhusi artigu sira konstiuisaun;

• Fundamentu teolójiku: Konst n. 36 “hetan razaun kle’an ninia ezistensia nian iha mistériu komuñaun trinitária”.
• Ho estilu karizmátiku: Konst n. 49 moris no serbisu hamutuk iha Na’i nia naran.
• Iha komunidade laran: Konst n. 50 Artigu ida ne’e dedika tomak ba Espíritu familia nian, hodi aprezenta ninia importánsia ba irmán ida-idak: Espíritu família, forsa kriativa husi Don Bosco nia fuan, tenke karakteriza ita nia komunidade ida-idak no ezije hotu-hotu nia empeñu.
• Komunidade no misaun: Konst. n. 51, buat hotu iha komunidade, hala’o tan ita nia misaun: la iha divizaun entre komunidade no apostoladu, tanba hanesan família baibain ida, fó ita nia kontributu rasik atu kria ambiente edukativu jenuinu Valdoco no Mornese nian.

Madre Alma,  taka enkontru ne’e hodi fó pergunta mai ami hodi reflete nu’udar mesak no fahe iha grupu bazeia ba surat sirkular 760 Madre Marinella nian ne’ebé ko’alia kona-ba komunidade, haree kedas katak pergunta sadik ami-nia hanoin no ami nia hahalok moris nian. Liu-liu oinsá atu hatán ba situasaun ohin loron nian, nu’udar juniora ida iha komunidade ne’ebé hela bá. Nune’e nu’udar empeñu buka atu fó tempu hodi le’e fali Konstituisaun kona-ba Artigu moris fraterna no la’o hamutuk ho santidade komunidade nian.

            Ami hotu agradese ba Madre Alma, ne’ebé fahe ona ho ami vida fraterna ne’ebé loos, ami sei haka’as-an hodi moris tuir, maski “monu hamriik”.

(Agata Freitas)