Sidade Vaticano – “Ha’u retira iha orasaun atu kontinua serví Kreda “ho dedikasaun hanesan no domin  nu’udar ha’u halo to’o ohin loron”. Ne’e mak liafuan sira Bento uza atu despede husi ema liu rihun atus ida halibur iha Prasa S. Pedro, iha Angelus ikus Pontifikadu nian. Hafoin nia agradese sarani sira ho lian hitu “ba domin no kondivizaun” hatudu ba nia no ba Kreda iha momentu partikulár ne’e.

Iha ninia hateken ikus husi janela ne’ebé ba tinan ualu haree nia fó bensan ba ema lubun boot iha domingu-domingu, Amu-Papa fó sai katak sá ninia retiru ne’e. No Evanjellu domingu II Kuarezma nian – Jezús nia transfigurasaun iha Pedro, João no Tiago nia oin – hatudu ilas loloos kona-ba ninia retiru ne’e. Pasajen ida-ne’e be “furak tebes” mak “Maromak nia Liafuan ne’ebé ha’u sente dirije mai ha’u ho modu partikulár, iha momentu ha’u-nia moris nian ida-ne’e”:

 

“Na’ bolu ha’u atu ‘sae foho’. Atu dedika liután ba orasaun no meditasaun. Maibé ida-ne’e la signifika ha’u abandona Kreda, liután, se Maromak husu ida-ne’e tanba atu ha’u bele kontinua serví nia ho dedikasaun hanesan no domin  nu’udar ha’u halo to’o ohin loron, maibé ho modu ne’ebé adata ba ha’u-nia idade no kbiit sira”.

Ba ema hotu ne’ebé rona nia, Bento XVI saran pensamentu foun ida, hanoin ikus ne’ebé ema hotu ne’ebé tuir didi’ak ninia hanorin ho atensaun no pontualidade, hatene katak tama ona iha istória. Nia ko’alia kona-ba orasaun:

“…primadu orasaun nian, ne’ebé lahó nia empeñu hotu apostoladu no karidade nian sei redús de’it ba ativizmu. Iha Kuarezma mai ita aprende atu fó tempu justu ba orasaun pesoál no komunitária, ne’ebé fó iis ba ita-nia moris espirituál. Liután, orasaun la’ós haketak an husi mundu no husi ninia kontradisaun sira, hanesan Pedro iha Tabór hakarak halo, maibé orasaun ne’ebé lori ba dalan, ba asaun”.

Bele haree husi TV Rai International oinsá ema barak prezente iha Prasa S. Pedro hatudu inserteza iha sira-nia oin, hanesan lakon pontu atu refere maibé mós solidariedade no afetu. Barak husi sira mak movimentu katóliku sira ne’ebé hatene hodi esperiénsia rasik katak halo silénsiu iha orasaun mak rekerimentu uluk liu ba asaun hodi nakfilak karidade iha faktu sira. Sira barak hakerek liafuan obrigadu iha lian oioin: Merci, thanks, danku… Iha banner ida bele lee “Noi ti abbiamo capito e continueremo ad amarti” katak “”ami komprende ita no ami sei kontinua hadomi ita”. No Bento XVI ba sira hotu nia hato’o ninia gratidaun. “Grazie” mak ninia  liafuan uluk, “grazie mak ninia liafuan ikus:

“Ha’u agradese imi-nia domin no partilla, liuliu iha orasaun, iha momentu partikulár ne’e ba ha’u nia an no ba Kreda. Ba imi hotu ha’u hato’o domingu di’ak no semana ida di’ak. Obrigadu, iha orasaun ita besik malu nafatin!”.