RV – Tema sentrál katekeze Papa Francisco nian, iha kuarta, 15 Juñu, mak roman mizerikórdia nian. Papa Francisco dezenvolve reflesaun semanál ho sarani sira hahú husi epizódiu bíbliku matan-delek Jericó nian (Lc 18, 35-43).

Download

“Matan-delek ne’e nia figura reprezenta ema barak ne’ebé, ohin mós heta sira-nia an marjinalizadu tanba problema fíziku ida eh tipu seluk”, Papa Francisco hateten. Iha lurón ninin, ema matan-delek tur ketak no ema lubun-boot haksiak nia, tanba nia bolu Jezús. Ema sira la iha kompaixaun ho nia no no sente inkómodu ho ninia hakilar sira.

“Dala hira mak ita haree ema moras sira iha lurón sira, lahó ai-han, no ita sente inkomoda ita!Ne’e mak tentasaun ida ita hotu iha, até ha’u. Dala ruma, indiferensa no ostilidade nakfilak iha agresaun no insultu. ‘Haruka tiha ema sira-ne’e.” Indiferensa no ostilidade halo sai delek no diuk, impede atu haree maun-alin sira no la permite rekoñese Na’i iha sira”.

Amu-Papa resalta katak, ema matan-delek la ta’uk ho ema nia hakilar no, hodi rekoñese Jezús nu’udar Mesias ne’ebé sira hein, nia bolu Nia dala barak. Diferente husi ema lubun boot, matan delek ne’e haree ho matan fiar nian, Amu-Papa subliña. Tanba fiar mak ninia hakilar hetan efikásia: Jezús hasai ema matan-delek husi lurón ninin no tau nia iha sentru atensaun eskolante no ema lubun boot nian. “Ita hanoin ba ita-nia situasaun ladi’ak sira, salan nian: Jezús kaer ita-nia liman no lori ita iha dalan salvasaun nian”.

Halo nune’e, Jezús halo atu ema hotu sai konxiente katak Liafoun Di’ak implika tau iha ita-nia dalan nia sentru ema ne’ebé eskluidu. “Na’i nia pasajen mak enkontru ida mizerikórdia nian ne’ebé halibur hale’u Nia, atu permite rekoñese ema ne’ebé presiza tulun no konsolasaun”, Amu-Papa dehan.

Tanba fiar, ema matan-delek rekupera vizaun no, liuliu sente Jezús hadomi nia. Tanba ne’e, nia deside tuir Nia, sai dixípulu. “Husi ema husu ezmola ba dixípulu. Ita hotu mak ema husudór, ita hakat husi ema husu husu ezmola ba dixípulu sira.”

Ida-ne’ebé ema lubun boot hakarak nia nonok agora sai sasin, ho lian maka’as, ninia enkontru ho Jezús Nazaré, Amu-Papa esplika. Milagre daruak akontese: kura ema delek permite atu ema lubun boot mós haree aleinde aparénsia sira. “Nune’e Jezús hasuli mizerikórdia iha sira hotu ne’ebé Nia hasoru: bolu sira, halibur sira, kura no leno sira, kria povu foun ida ne’ebé selebra ninia domin mizerikórdiozu nia kmanek sira. Mai ita tuir Na’i”, Amu-Papa remata.