Don Bosco mestre devosaun mariana nian

Ita hatene katak Don Bosco moris no simu edukasaun iha ambiente marianu ne’ebé kle’an tanba tradisaun Kreda lokál no devosaun família nian. Ita hanoin fali katak simu tiha nia hatais kleru nian, loron ruma molok bá semináriu mamá Margherita bolu nia no fó lia-menon sira-ne’e: «Ha’u-nia Joãozinho,… bainhira ó mai iha mundu ne’e ha’u konsagra ó ba Beata Virjen Maria; bainhira ó hahú ó-nia estudu ha’u rekomenda ba ó devosaun ba ita-nia Inan; no se karik ó sai amlulik, hameno no habelar nafatin devosaun ba Maria».

Don Bosco sai fiél duni ba nia inan nia lia-menon  sira: nia sai boot iha Maria nia eskola, nafatin sente nia besik iha momentu hotu nia moris nian. Nia fó Maria ba ninia foin-sa’e sira, ba Salezianu sira, ba FMA sira, ba Kooperadór/a sira. Nia harii asosiasaun ida atu habelar devosaun ba  Maria. Nia halo ema barak hadomi Maria!

Don Bosco nia devosaun ba Maria Tulun-Na’in ka Ausiliadora la mai mesak de’it. Ida-ne’e mak liña espirituál no apostólika ne’ebé dezenvolve no sai tasak iha tempu. Devosaun nia konkretizasaun prátika mak santidade iha hahalok no moris ne’ebé sai karakterístika espiritualidade Don Bosco nian. Nia husik devosaun ne’e nu’udar limanrohan ba nia oan sira. “Oh, se ha’u bele tau iha imi, nia dehan iha Bonoite ida, domin boot ne’e ba Maria no Jezús iha sakramentu, ha’u sei sorte boot liu! Rona mai, karik ha’u dehan buat ruma beik uitoan, maibé la buat ida. Ha’u prontu atu rasta ha’u nia nanál iha rai husi ne’e to’o Superga. Ne’e be’ik maibé ha’u prontu atu halo. Ha’u-nia nanál sei rahun; maibé la importa buat ida: ha’u sei iha santu foin-sa’e barak”.

Nune’e, Don Bosco liga santidade ho devosaun ba Ausiliadora. Ita fiar duni katak Maria mak Tulun-Na’in atu forma sarani sira. Tulun-Na’in  iha funu boot entre di’ak no aat, entre vida no mate, entre naroman no salan. Don Bosco repete mai ita: ”Bolu nia Ausiliadora. Nia haksolok liu atu fó tulun ita” (MB. XVI, p. 269).