Venilale – Iha loron 29/05/2016, oratoriano Waibua, Waihaco no Lia-Oli ho Madre sira ba hala’o passeio no halo peregrinasaun kiik iha Ossu hafoin liu to’o iha Viqueque.  Objetivo ida ne’ebé lori ami atu atinji mak: hametin amizade entre sentru WWL (Waibua, Waihaco no Liaoli) atu haburas domin no ksolok ba malu. Ami ba ho entusiazmu no iha mós aktividade oioin ne’ebé ami realiza mak; Orasaun, formasaun konabá Rahun di’ak sira tuir textu Evanjellu Mt. 5: 7-9, 12 no halo jogus animado.

 Esperiensia ida ne’e hetan apresiasaun barak husi labarik no kolaboradores sira, liu-liu ba sira ne’ebé foin mak primeira vez partisipa ksolok espíritu Salesiana nian ne’ebé nakonu ho amizade no ksolok lo’os nian, tan ne’e sira agradese tebes ba oportunidade ne’e.

Animador sira haksolok tebes. Ho paseio ida ne’e sai nu’udar opurtunidade atu hametin sira nia fiar no admira beleza Igreja nian iha Ossu no Viqueque. La to’o deit haree ba estatua sira ne’ebé iha Igreja laran maibé ho orasaun no ho sira nia kontemplesaun konabá natureza mak halo kompleta sira nia ksolok no deskobre katak iha moris ne’e ita laos mesak maibé ho ema seluk nia tulun no natureza nia furak sira mak halo moris sai furak tanba bele aprende lao tuir naroman ksolok  no moris iha lialos no iha Nia deit mak bele hetan sentidu ba moris  nu’udar oan mane no oan feto naroman ksolok nian nune’e sira bele sai sasin Jesus nian iha ambiente ne’ebe sira horik ba.

(Agata Freitas)