Dili – Molok atu tama ba Festa Maria Auxiladora nian ( 23 Maiu)  kalan vigilia ba Nain Feto Auxiliadora, Komunidade hamutuk ho viziñu sira  no mos Irmãs Canosiana sira partisipa velada kalan nian hamutuk ho Nain Feto Auxiliadora,hodi reza tersu hamutuk molok selebra Ninia Festa iha loron 24 Maiu.

Iha loron 24 Maiu, tuku 16: 30 lokraik, prosisaun ba Nain Feto Auxiliadora hahu sai husi Komunidade FMA Balide, hamutuk sarani sira kuaze 500 pesoas ne’be mai hamutuk  konsentra iha Komunidade mak foin halao prosisaun ba Parokia Balide. Sarani  sira nia partisipasaun hodi reza tersu hamutuk ho Nain Auxiliadora bele  hatudu katak sira iha domin boot ba ba Nain Feto nudar inan iha moris lor-loron nian. Sarani sira reza ho devosaun boot maski iha dalan trafiku ho transporte oin –oin ne’ebe  ba  no mai. Sarani sira lori Nain Feto nia ilas  tuir grupu  lda-idak too tama ba Igreja laran.

Bainhira Nain Feto atu tama ba Igreja laran Irmas FMA hamutuk Irmas Canosiana sira mak lori too hatur iha fatin ne’ebe prepara ona iha igreja laran.

Ikus liu mak taka ho misa Solene ba Nain Feto Auxiliadora ne’ebe preside husi Amo Paroco Balide Padre Adriano Ximenes, Pr.

Padre iha ninia omilia ba dala uluk nia hateten ba sarani sira katak Maria Auxiliadora laos deit Salesiano/a sira nia Nain Feto, maibe ida nee Sarani hotu nian. Tan nee husu ita atu tau ita nia devosaun ba Nain Feto Auxilaidora tanba nia protettora ba ita sarani sira hotu.

Iha Evanjellu nain Feto nia prezensa sai nudar tulun nain ba familia sira iha festa kaben nian iha rai Kana. Nia matan hare hetan ema nia presiza hodi husu  tulun ba nia Oan Jezus. Iha eventu nee mak hare Nain feto nia figura nudar Tulun Nain.

Don Bosco mos hili Nain Feto Auxiliadora tanba nia iha devosaun espesial ho Nain Feto Auxiliadora. Iha Don Bosco nia Viagem Espiritual, Nain Feto sai ba nia nudar Inan, guia no Mestra ba nia vokasasun no misaun tomak.

Nudar rekordasaun ba Nain Feto Auxiliadora nia festa Irma sira fahe imajen Maria Auxilaidora nian ba partisipante hotu ne’ebe tuir selebrasaun nee.

(Ines Freitas)