RV – “Maromak nia mizerikórdia liga ho ita-nia mizerikórdia ba maluk. Bainhira ita la iha mizerikórdia ba ema seluk, Maromak nia mizerikórdia la hetan espasu iha ita-nia fuan ne’ebé taka”, Santu Padre hateten iha katekeze loron 18 Maiu 2016.

Papa Francisco esplika katak ema riku no Lázaro nia ai-kanoik demonstra buat ne’e.  Odamatan ema riku nia uma nafatin taka ba ema kiak, ne’ebé latan hamlaha no nakonu ho kanek. Hodi ignora Lázaro no nega mós buat ne’ebé monu husi nia meza, ema riku despreza Maromak, tuir liafuan sira ne’ebé Jezús dehan” “Imi la halo karik buat ne’e ida ki’ik-oan ida, imi la halo mai Ha’u rasik”.

Download

Tuir Amu-Papa, ita bele afirma katak “ignora ema kiak katak despreza Maromak”.

“Maromak tulun”

Iha ai-kanoik ida-ne’e, Santu Padre kontinua, iha pormenór interessante ida: enkuantu ema riku nia naran la temi, ema kiak nian, Lázaro, ne’ebé iha ebraiku signifika “Maromak tulun”, repete dala lima.

Nune’e Lázaro iha odamatan mak apelu forte id aba ema riku atu hanoin Maromak, maibé ema riku la simu apelu ida-ne’e. Nia sei hetan kondenasaun la’ós ba ninia rikusoin sira, maibé tanba nia la iha kompaixaun ba Lázaro hodi tulun nia, Amu-Papa hateten.

Atitude ne’e nia erru mak buat ne’ebé verifika iha parte daruak ai-kanoik nian, ne’ebé hatudu situasaun kontrária husi sira rua depoizde mate: Lázaro ne’ebé kiak haree haksolok iha Abraaun nia knotak, enkuantu ema riku hetan susar.

Oras ne’e, make ma riku rekoñese Lázaro no husu tulun ba nia, enkuantu iha moris nia halo finje la haree Lázaro. Uluk, nia nega hahán restu monu husi meza; agora, nia husu atu fó hemu ba nia. Maibé, hanesan Abraaun esplika, odamatan uma nian ne’ebé iha rai haketak ema riku husi ema kiak, nakfilak tiha ba “rai-kuak naruk ida”, ne’ebé labele hakat liu, Papa Francisco taka nia katekeze.