Baucau – Komisaun katekeze dioseze Baucau, tinan-tinan nafatin halo formasaun ba ministru estraordináriu komuñaun nian no mós investidura ba ministru foun sira. Tinan ne’e ema tuir formasaun ministru hamutuk 120, ho minsitru foun 26. Husi parte FMA sira, prezente Irmán sira husi komunidade S. Teresa d’Ávila na’in neen no hetan investidura Ir Jacinta de Deus.

Formasaun ne’e halo iha loron rua nia laran, husi loron 13-14 Maiu. Tópiku sira formasaun nian liga ho Tinan Santu Mizerikórdia nian no foti husi Bula Vultus Misericordiae.

Tema dahuluk aprezenta husi Pe Nelson Freitas, ne’ebé remata nia kursu iha liturjia aborda kona-ba Kreda ne’ebé simu bolun atu sai, iha fatin dahuluk, sasin loloos mizerikórdia nian. Pe. Nelson foka pontu sira kona-ba “mizerikórdia”, “Igreja ne’ebé simu bolun”,  no “sasin sira mizerikórdia nian”. Nu’udar liturjista nia kuestiona prátika ruma hala’o iha Kreda Timor nian liuliu “ministru estraordináriu komuñaun feto”, ne’ebé tuir nia la iha dokumentu ida Kreda nian aprova buat ida-ne’e. Asuntu ne’e hetan reasaun maka’as husi leigu sira no relijioza sira.

Ir Ervina Brito Martins fdcc, dezenvolve fraze naruk ida: “Atu Kreda sai mane no feto ida-idak nia lian ne’ebé tenik ho konfiansa no lahodi para: “’Hanoin bá Na’i, kona-ba ita-nia mizerikórdia no ita-nia domin, basá sira eziste horiuluk kedas” (Sl 25/24,6).

Ir Jacinta Gusmão fma mós sai fasilitadora iha enkontru formativu ne’e, hodi aprezenta tópiku “Mizerikórdia nu’udar fonte ksolok, hakmatek no dame nian” (kf MV2). Sai ema mizerikordiozu ne’e ita aprende husi ki’ik iha família laran, bainhira ita internaliza modelu “affective bonding” husi inan-aman sira. Modelu internu ne’e mak sai “working model” ba ita-nia relasaun ho ema seluk, iha família, iha komunidade no ho Maromak.

Ko’alia kona-ba mizerikórdia, iha Maromak nia revelasaun, “Jezús mak Maromak nia “rosto” eh oin mizerikórdia nian. Ne’e mak tema dezenvolve husi Pe. Alípio Pinto Gusmão. Pe Alípio aprezenta livru Kardeál Kasper nian ho títulu “Misericórdia: condição fundamental do Evangelho e chave da vida crista”. Pontu sira ne’ebé Pe Alípio salienta husi livru ne’e mak: diferensa entre domin no mizerikórdia; mizerikórdia iha relasaun ho justisa; mizerikórdia nu’udar pontu ida diálogu nian ho luteranu sira no ateu sira”.

Palestrante seluk mak Pe Rolando Fernandez sdb, ne’ebé foka kona-ba konversaun hodi hala’o obra sira mizerikórdia nian.

Oradór ikus nian mak Pe Jovito Araújo ne’ebé lori tópiku “Maromak nia aliansa ho umanidade ninia fundamentu mak Maromak nia mizerikórdia. Maromak hahú aliansa ne’e husi kedas Adaun, Noé, Abraaun, Moisés, David no ida ida ikusliu mak aliansa liuhusi nia Oan-Mane Jezús Kristu. Aliansa iha maibé lahó fidelidade aliansa ne’e la folin.

Formasaun remata ho investidura no renovasaun mandatu nian halo durante selebrasaun Eukaristia nian.