RV – Ai-kanoik Aman Mizerikordiozu nian mak tema Auidénsia jerál iha kuarta, 11 Maiu 2016. Amu-Papa komenta testu foti husi Evanjellu Lucas nian, ne’ebé ko’alia kona-ba Aman ida ho laran-sadia rohan-laek ho ninia oan-mane na’in rua.

Papa Francisco esplika katak oan-mane ki’ik sai husi uma no, bainhira filafali nia aman la rai hirus, maibé hatudu de’it sentimentu ksolok nian tanba rekupera fali oan ne’ebé lakon, Ida-ne’e, Paa Francisco resaltam hanorin ita katak ita-nia kondisaun  nu’udar Maromak nia oan sira la depende ba ita-nia erru eh ita-nia hahalok loos sira, maibé buat hotu mak rezultadu eh frutu husi Ama nia fuan domin nian.

Download

Domin inkondisionál

“Ha’u hanoin ba inan sira no aman sira ne’ebé preokupa bainhira haree oan sira hadook an hodi ba iha lurón perigozu sira. Ha’u hanoin ba pároku sira no katekista sira ne’ebé, dalaruma, husu se sira-nia serbisu ne’e la leet de’it. Maibé ha’u mós hanoin iha ema ne’ebé hela iha kadeia no hanoin katak nia moris hotu ona, ba sira ne’ebé halo hilin laloos no la konsege hatke ba futuru, ba sira hotu ne’ebé iha hamlaha ba mizerikórdia no perdaun no fiar katak sira la merese. Iha situasaun naran de’it moris nian, ha’u labele haluha katak ha’u la para atu sai Maromak nia oan, oan husi Aman ida ne’ebé hadomi ha’u no hein ha’u atu fila-hikas”.

Reflete kona-ba oan-mane boot nia postura, Amu-Papa destaka katak nia gaba an katak nia horik nafatin iha aman nia sorin no serví nia, maibé nia la moris ho koslok prosimidade ida-ne’e. Tuir Papa Francisco, ida-ne’e hatudu katak lójika rekompensa nian halo ita ignora katak ita la horik iha aman nia uma, atu bele hetan benefísiu ruma, maibé tanba ita iha dignidade oan sira-nian ne’ebé kompartilla aman nia responsabilidade sira.

Kristu nia lójika

Oan-mane ki’ik hanoin katak nia merese kastigu ida ba ninia salan sira rasik, oan-mane boot hein rekompensa ba ninia servisu sira. Maun-alin na’in rua ne’e la ko’alia ba malu, moris istória diferente, maibé na’in rua hotu rasiosina/hanoin tuir lójika ida ne’ebé la’ós Jezús nian: se ó komporta di’ak ó simu prémiu; se ó komporta aat, ó hetan kastigu, Amu-Papa esplika. “Ida-ne’e la’ós Jez’us nia lójika”.

Atu taka, Papa Francisco dehan katak Aman nakfilak lójika oan sira-nian: presiza halo festa, tanba nia alin fila hikas. Lahóon-ki’ik, oan-boot mós husik atu sai maun. “Aman ida nia ksolok boot liu mak haree nia oan sira rekoñese nu’udar maun-alin”, Papa Francisco hateten.

“Oan sira be’e deside atu sai ida de’it ho aman nia ksolok eh rejeita nia, No ai-kanoik remata hodi husik ninia finál suspensu: ita la hatene saida mak oan-mane boot deside, Ida-ne’e estímulu ida mai ita. Evanjellu ida-ne’e hanorin ita katak ita hotu presiza tama iha aman nia uma no partisipa iha ninia ksolok, iha festa mizerikórdia no fraternidade nian. Ita loke ita-nia fuan atu sai mizerikordiozu hanesan Aman”.