Sidade Vaticano (RV) – Bento XVI iha kuarta ohin, simu sarani no peregrinu sira rihun ba rihun iha Aula Paulo VI ba Audiénsia Jerál – eventu uluk hafoin nia fó sai ninia demisaun. Defaktu, iha Audiénsia, Amu-Papa dirije ba ema sira halibur hamutuk ho nia ho liafuan sira tuirmai ne’e:

 

 

“Hanesan imi hatene ona, ha’u deside renunsia ministériu ne’ebé Na’i konfia mai ha’u iha loron 18 Abríl 2005. Ha’u halo ho liberdade tomak ba Kreda nia di’ak, depoizde harohan barak no ezaminia ha’u-nia konxiénsia iha Maromak nia oin, konxiente kona-ba hahalok ne’e nia gravidade, maibé, tempu hanesan, konxiente katak ha’u la soi ona kbiit atu hala’o minstériu petrinu ho forsa fízika no espíritu nian ne;ebé misaun ne’e husu. Serteza ne’ebé tahan no leno ha’u mak Kreda Kristu ninian, nune’e Nia sei la husik nia kuran iha mahein no kuidadu. Ha’u agradese imi hotu ba domin no orasaun ne’ebé akompaña ha’u iha tempu ne’e. Obrigadu, fizikamente iha loron hirak ne’e ha’u sente la fasil, kbiit orasaun nian ne’ebé mai husi domin ba Kreda, imi-nia orasaun, ne’ebé imi oferese mai ha’u. Kontinua reza mai ha’u, ba Kredam no ba futuru Papa. Na’i sei gia ita”.

 

Katekeze kuarta ne’e nian dedika ba tempu litúrjiku Kuarezma nian – loron haatnulu ne’ebé prepara ba selebrasaun Santa Páskua. “Ne’e mak períodu esforsu espesial nian iha ita-nia dalan espirituál”, Amu-Papa dehan, hodi esplika katak ne’e mak tempu ne’ebé Jezús hala’o iha rai-fuik maran molok hahú nia vida públika, no iha-ne’ebé nia hetan babeur husi diabu.

[Asesu kópia ho lia-portugés]

Hodi reflete kona-ba tentasaun sira Jezús koko, ita ida-idak simu konvite atu fó resposta ba pergunta fundamentál ida-ne’e: Fatin ida-ne’ebé mak Maromak okupa iha ha’u-nia moris?

Prova sira ne’ebé sarani sira hetan husi sosiedade atuál barak tebes no kona ba moris pesoál no sosiál. La’ós fasil sai fiél ba moris kaben-na’in sarani, pratika laran-sadia iha moris loroloron, fó espasu ba orasaun no silénsiu interiór. “Ita nafatin iha tentasaun atu tau ba sorin fiar rasik no konversaun sai resposta ida ba Maromak ne’ebé dala barak mak ita tenke konfirma iha moris”, nia afirma.

Iha tempu Kuarzma nian ne’e. iha Tinan Fiar nian, Amu- Papa konvida ita atu hafoun ita-nia empeñu iha dalan konversaun nian, atu manán tendénsia sira atu taka iha an rasik no fó espasu ba Maromak no ho ninia matan hateke ba realidade moris loroloron. “Konverte an signifika la taka an atu buka susesu rasik, iha egoízmu rasik, iha prestíjiu rasik, maibé halo oinsá atu iha moris loroloron, iha buat ki’ik sira, lialoos, fiar iha Maromak no domin sai buat sira ne’ebé importante liu.”