Tema domingu ne’e nian mak Espíritu Santu. Maromak nia don ba fiar-na’in hotu, Espíritu ne’ebé fó vida, hafoun, nakfilak, harii komunidade no halo moris Ema Foun.

Evanjellu aprezenta mai ita komunidade kristán, halibur hale’u Jezús moris-hi’as. Ba João, komunidade ida ne’e sai komunidade moris nian, kria foun fali, husi don Espíritu nian. Espíritu mak permite fiar-na’in sira atu manán laran-ta’uk no limitasaun sira no fó sasin iha mundu kona-ba domin ne’e, ne’ebé Jezús rasik moris to’o iha konsekuénsia ikus.

Iha leitura dahuluk, Lucas sujere katak Espíritu mak lei foun ne’ebé orienta fiar-na’in nia dalan. Nia mak kria komunidade foun Maromak nia Povu nian, halo ema iha kbiit atu ultrapasa diferensa sira no komunika, nia mak halo komunidade ida de’it iha domin, maski mai husi povu hotu, rasa no kultura sira.

Iha leitura daruak, Paulo aviza katak Espíritu mak bee-matan husi ne’ebé suli komunidade kristán nia moris. Nia mak haraik don sira ne’ebé hariku komunidade no haburas unidade membru hotu nian; tanba ne’e, don sira ne’e la bele uza ba benefísiu pesoál, maibé tenke uza ba ema hotu nia servisu.

Download