“Hakribi salan no fiar Evanjellu”

 

Kuarezma mak tempu litúrjiku Kreda fó mai ita atu, liuhusi konversaun, ita bele prepara an ba festa boot Páskua. Kuarezma mak tempu atu arrepende ba ita-nia salan sira no troka buat ruma iha ita nune’e bele sai di’ak liután no bele moris besik liután hanesan Kristu.
Kuarezma dura loron 40; hahú ho kuarta Akudesan nian no taka ho Kinta Santa, ho misa Han Kalan ikus Na’i nian. Durante tempu ne’e, liuliu iha liturjia domingu nian, ita halo esforsu atu rekupera ritmu no estilu moris fiar-na’in nian nu’udar Maromak nia oan loloos.

Kór litúrjiku iha tempu ida-ne’e mak violeta/roxu, signifika lutu no peniténsia. Kuarezma mak tempu ida reflesaun nian, peniténsia nian, konversaun espirituál nian; tempu preparasaun ba mistériu paskál.
Iha kuarezma, Kristu konvida ita atu nakfilak moris. Kreda konvida ita atu moris Kuarezma nu’udar itineráriu ne’ebé lori ita ba Jezús Kristu, liuhusi rona Maromak nia Liafuan, orasaun, partilla ho maluk sira no kumpre hahalok di’ak karidade nian. Nia konvida ita atu moris atitude sarani nian ne’ebé tulun ita atu sai hanesan ba beibeik ho Jezús Kristu, husi momentu ne’ebé, tanba salan, ita hadook an husi Maromak.
Nune’e, kuarezma mak tempu perdaun nian no rekonsiliasaun fraterna. Loroloron, iha moris tomak, ita tenke fokit sai husi ita-nia fuan ódiu, hirus no vingansa, inveja, laran-moras, ne’ebé hanetik  ka sai obstákulu ba ita-nia domin ba Maromak no maun-alin sira, Iha kuaresma nia laran, ita aprende mós atu hadomi Jezús nia Krús. Halo nune’e ita aprende mós atu lori ita-nia krús ho hakmatek, hodi to’o ba glória resurreisaun nian.

Loron 40

Durasaun kuarezma nian liga ho simbolizmu númeru 40 ne’ebé ita hetan iha Bíblia. Bíblia haktuir mai ita kona-ba loron haatnulu dilúviu nian, tinan haatnulu povu ebreu nia marxa iha rai-fuik maran, Moizés no Elias nia loron haatnulu iha foho leten,  loron haatnulu Jezús nian iha rai-fuik maran molok hahú ninia ministériu públiku, tinan 400 iha ne’ebé ebreu sira hela iha Ejitu.
Iha Bíblia, númeru haat simboliza universu materiál,  tuir ho zero signifika tempu ita-nia moris iha rai akompaña ho provasaun no difikuldade.
Prátika kuarezma nian hahú iha sékulu IV, bainhira Kreda tomak moris tempu peniténsia  no renovasaun nian ho prátika jejún ka hadera an no abstinénsia. Ohin loron prátika ne’e sai mamar ona; Kreda husu atu halo jejún no abstinénsia iha loron rua de’it: kuarta Akudesan no Sesta Santa, maski nune’e konvida ita atu iha ba beibeik espírtitu peniténsia no konversaun nian, liuliu hodi troka hahalok la evanjéliku sira.

Hanesan Amu-Papa Bento konvida ohin iha ninia mensajen “iha Tinan Fiar nian ida-ne’e mai ita hafoun ita-nia empeñu konversaun nian, atu manán tendénsia sira atu taka iha an rasik no fó espasu ba Maromak no ho ninia matan hateke ba realidade moris loroloron nian”.

“Bom caminho”.