RV – Iha audiénsia jerál kuarta, 4 Maiu 2016, iha Prasa S. Pedro, Papa Francisco halo reflesaun ida kona-ba ai-kanoik bibi ne’ebé lakon no subliña katak Maromak la koñese “kultura deskarte” nian (uza no soe). Ita tenke saAmu-Papa tenik katak ita presiza reflete liután kona-ba ai-kanoik ida-ne’e no halo adverténsia ida ba sarani sira: “ita keta taka an, se lae ita iha kulapur nia iis. Ita tenke sai ba li’ur”.

Download

Ai-kanoik ne’e Jezús uza atu halo ema komprende kona-ba ninia prosimidade ba ema maksalak sira, ne’ebé labele sai motivu ida eskándalu nian, maibé, tenke provoka ema hotu ba reflesaun séria ida kona-ba oinsá ita moris ita-nia fiar.

Maromak nia estilu

“Hanorin ne’ebé Jezús hakarak tranzmite mai ita mak la iha bibi ida mak bele lakon. Maromak nia hahalok mak ida ne’ebé bá buka oan sira ne’ebé lakon atu hafoin halo festa no haksolok tan hetan fali hamutuk ho sira seluk”.

Amu-Papa afirma katak Jezús nia kritériu la sukat husi todan ne’ebé bibi 99 iha iha dasin kontra ida de’it.

“Ita hotu sai konxiente bá: mizerikórdia ba ema maksalak sira mak estilu ne’ebé Maromak hodi halo, no ba mizerkórdia ne’e Nia fiél ho modu absolutu: la iha buat ida eh ema ida mak bele hasees nia husi ninia vontade salvasaun nian”.

Maromak hein ita iha ne’ebé Nia horik bá

“Maromak la koñese ita-nia ‘kultura deskarte” ohin loron nian, buat ne’e la pretense ba Nia. Maromak la soe ema ida, Nia hadomi ema hotu, bá buka ema hotu, ida-idak, Nia la koñese liafuan “deskarta” (soe) ema sira basá Nia mak Domin Tomak no mizerikórdia tomak”.

Atu hasoru Kristu, Papa Francisco esplika katak ita tenke konxiente katak ninia bibi-luhan nafatin iha dalan: ita labele dadur Na’i tuir ita-nia eskema estratéjika sira.

“Ita sei hetan bibi-atan iha-ne’ebé iha bibi ne’ebé lakon. Tanba ne’e tenke buka Na’i iha ne’ebé Nia hakarak ita hetan Nia, la’ós iha ne’ebé ita hakarak hasoru Nia”.

Sarani sira ho iis kulapur nian

Papa Francisco ko’alia mós kona-ba fatin mamuk sira, husi ema sira ne’ebé la’o lakon no husik komunidade sarani. “Dalaruma, buat ne’e la enkoraja no lori atu hanoin katak nia bibi ida ne’ebé tenke evita. Entaun ita iha risku atu taka an iha luhan laran, iha-ne’ebé la iha bibi nia iis, maibé kulapur nian. Ita sarani sira labele taka an se lae iis kulapur. Ita tenke sai ba li’ur”, Amu-Papa husu.

“Ita tenke komprende didi’ak buat ne’e, ba Maromak la iha ema ida ne’ebé lakon ho modu definitivu. Nunka, to’o  momentu ikus liu, Maromak buka ita. Imi hanoin kona-ba na’ok-teen di’ak”.