Beatissimo Padre,

ami rona notísia kona-ba ita-nia demisaun nu’udar Bispu Roma nian no nu’udar S. Pedro nia susesór nu’udar Matadalan iha Kreda Universál, hahú husi loron 28 Fevereiru 2013. Ami hakohak komunikasaun ida-ne’e, ne’ebé mai derepente, ho respeitu boot, hodi medita liafuan sira ne’ebé Ita rasik fó sai iha anúnsiu ne’e: «Depoizde halo ezame konxiénsia beibeik iha Maromak nia oin, ha’u to’o iha serteza katak ha’u nia forsa sira, tanba idade avansada, la’ós idóneu ona atu hala’o ho modu adekuadu ministériu petrinu».
Komosaun no gratidaun mak sentimentu ne’ebé hakonu ami-nia espíritu no sai nu’udar invokasaun bensan no grasa sira ba Ita.
Ami agradese Ita, Santidade, tanba gia Kreda iha fidelidade ba Kristu no ho atensaun boot ba sinál sira tempu nian. Ita orienta Pedro nia roo ho atensaun iha rota segura, hodi konfirma nia iha esperansa metin iha mistériu paskál Kristu nian.
Ita-nia rezignasaun halo iha Tinan Fiar nian, no iha eventu ne’e nia roman mak ami hakarak lee eventu ida-ne’e ne’ebé halo ami hakfodak no admira: tanba ami la hein ida-ne’e no ba serenidade no konxiénsia ne’ebé Ita iha bainhira hato’o ida-ne’e mai ami.
Obrigada, Santidade ba don presiozu Ita-nia majistériu prdináriu no estraoordináriu, ne’ebé kontinua gia ami iha tinan mai no ne’ebé nafatin sai inspirasaun ba ami nu’udar Institutu.
Ita-nia ensíklika dahuluk Deus caritas est halo ami laran-manas tebes no nakonu ho agradesimentu. Nia konfirma ami iha dalan ne’ebé ami-nia Fundadór trasa ho Sistema Preventivu iha edukasaun juventude nian bazeia ba domin ne’ebé lori ba ksolok nakonu iha Kristu. Ita-nia Majistériu ne’ebé riku sai mai ami eskola ida moris nian, konvite ida ba esperansa, ba solidariedade, ba dame no, liuliu, atu orienta ani-nia ezisténsia ba Nia ne’ebé, mesad de’it bele fó sentidu no diresaun ba ami-nia vida.
Ita ho modu konstante hatudu mai ami dalan ba santidade, sai peregrinu dame nian iha estrada sira mundu nian, hodi orienta umanidade ba konvivénsia polítika no solidária bazeia ba valór universál sira. Ami valoriza ho modu espesifíku liafuan sira Ita hato’o ba vida konsagrada. Durante Asembleia Jerál Ordinária Sínodu Bispu sira-nian kona-ba Evanjelizasuan Foun ami rona ho domin no gratidaun Ita-nia liafuan no orientasaun sira, ho diponibilidade boot atu tradús iha ami-nia misaun edukativa..
Ami hakarak asegura ami-nia orasaun nakonu ho gratidaun no domin. Na’i Jezús akompaña ninia Kreda ho don Mahein ida ne’ebé kontinua atu haklaken Evanjelli ho aten-barani lialoos nian, ho harai-an, ho liberdade sasin nian ne’ebé ami admira iha Ita.

Ba ita ami nia prosimidade filiál.

Roma, 11 Fevereiru 2013