RV – Ai-kanoik Samaritanu Di’ak mak sentru katekeze Papa Francisco nian iha kuarta 27 Abríl, ba sarani sira halibur iha Prasa S. Pedro.

Download

Papa Francisco resume ba sarani sira ai-kanoik ne’e: ema ida halo viajen entre Jerusalém no Jericó, hasoru bandidu sira ne’ebé na’ok nia no baku tasak nia. Amlulik ida, levita ida no samaritanu ida liu husi ne’ebá. Amlulik no levita make ma relijiozu sira, koñese Maromak nia Liafuan, maibé ignora ema ne’ebé hetan asaltu no hetan kanek. Samaritanu di’ak mak fó tulun, judeu ida sismátiku (ne’ebé haketak an husi relijiaun loos), haree nu’udar estranjeiru, jentiu no foer.

“Hanorin dahuluk iha ai-kanoik mak ida-ne’e: la’ós automátiku katak ema ne’ebé frekuenta Maromak nia uma no koñese ninia mizerikórdia hatene hadomi maluk. Ó bele koñese Bíblia tomak, teolojia tomak, maibé domin… liu husi dalan seluk! Iha ema barak nia sofrimentu nia oin, ne’ebé terus hamlaha, violénsia no injustisa, ita labele sai espetadór de’it. Ignora ema nia sofrimentu signifika ignora Maromak!”, Amu-Papa hateten.

Papa Francisco destaka katak sentru ai-kanoik nian mak samritanu, ema desprezadu no iha ninia bisnis sira, maibé nia iha kompaixaun no halo buat hotu atu tulun ema ne’ebé presiza. “Ida-ne’e mak diferensa. Sira rua seluk haree, maibé sira-nia fuan pasivu enkuantu smaritanu di’ak iha ‘sintonia” ho Maromak nia fuan. Iha ninia jestu no asaun sira, ita identifika Maromak nia hahalok mizerikórdia nian: ne’e mak kompaixaun ne’ebé Na’i mai hodi hasoru ita ida-idak.

Ema samaritanu ne’e saran an kompletamente ba ema ne’ebé presiza, fó kuidadu, tempu no até osan. Tuir Amu-Papa, ida-ne’e hanorin katak kompaixaun no domin la’ós sentimentu ne’ebé liu, maibé signifika tau matan ba ema seluk, kompromete an, identifika an ho nia. “Ó sei hadomi maluk hanesan ó an rasik”, mak Na’i nia ukun-fuan, Papa Francisco fó hanoin.

“Ita labele klasifika ema seluk no haree sé mak maluk no sé mak lae. Ita bele sai maluk ba ema ne’ebé de’it iha nesesidade, no ita sei sai ida-ne’e se ita iha kompaixaun iha ita-nia fuan”.