Editoriál: Tinan Fiar nian, tempu favoravel ba renovasaun interiór

Tinan ida tan entrega ba ita atu haburas ita-nia moris nu’udar ema, nu’udar sarani, iha ita-nia vokasaun partikulár rasik, nu’udar konsagrada/u, nu’udar inan-aman, nu’udar sarani….

Nu’udar Kreda ita simu prezente Tinan Fiar nian atu hafoun fali ita-nia fiar. Amu-Papa iha tinan kotuk husu ba sarani sira maibé liuliu ema konsagradu/a sira atu aproveita didi’ak Tinan Fiar ne’e. Nia hateten: “Sa­rani hotu, maibé liuliu membru sira In­stitutu Vida Konsagrada nian, simu don inisiativa ida-ne’e, no ha’u hein katak sira bele moris Tinan Fiar nian nu’udar tempu favoravel ba renovasaun interiór, ne’ebé ita sente nafatin nesesidade, ho aprofundi­mentu kona-ba valór esensiál sira no ezi­jénsia sira konsagrasaun rasik”.

 

Ita hatene katak urjénsia boot iha Kreda Universál mak hatán ba dezafiu sira mai husi joven sira, família no formasaun ema Kreda nian. Ida-ne’e insisténsia ne’ebé tuir Dom Basílio mós, sai ita-nia Kreda nia preokupasaun. Loos duni, joven, família no ema konsagradu no amlulik sira mak rikusoin no forsa Kreda nian, maibé mós sosiedade nian. Agora, oinsá mak ita oras ne’e fó liman ba malu atu bele loos duni hatán ba dezafiu urjente sira-ne’e?

Tatoli iha edisaun ida-ne’e konvida ita hotu atu tama kle’an iha ita-nia moris, lee ita-nia istória ho Maromak nia matan buat barak ita la komprende iha moris no hatán ba Nia tuir vokasaun ne’ebé nia haraik mai ita ida-idak. Sá mak furak liu duké saboreia kmanek sira Maromak halo mai ita, nu’udar nia oan doben sira, Don Bosco nian, liuhusi ita-nia istória nu’udar FMA iha Timór ba tinan 25?

Tinan Foun ida ho Fiar nabilan!