RV – Iha domingu, 24 Abríl, adolexente 70.000 partisipa iha Misa ne’ebé Papa Francisco prezide iha Prasa S. Pedro iha okaziaun Tinan Santu Mizerikórdia nian. Santu Padre ko’alia ba sira kona-ba domin, liberdade no ksolok.

Durante omilia, Papa Francisco, hahú husi Evanjellu halo klaru ba adolexente sira katak domin mak sarani sira nia billete identidade.

“Ho liafuan seluk, domin mak billete identidade sarani nian, dokumentu válidu ida ida mesak atu rekoñese ita nu’udar Jezús nia dixípulu sira. Se dokumentu ne’e lakon ninia validade no la hafoun hikas ita para atu sai Mestre nia sasin”.

Santu Padre konvida adolexente sira atu sai Jezús nia dixípulu sira, belun loloos ne’ebé distinge liuhusi domin konkretu nabilan iha moris, Domin ne’ebé ezijente husu esforsu.

Papa Francisco afirma katak domin mak jeerozidade no dehan ba adolesente sira atu keta haluha Na’i ne’ebé “la haluha atu oferese mai ita don espesiál ida loroloron”.

“Basá Na’i nafatin ho ó no sente kontente atu horik ho ó atu soe dai sira no halo ó-nia talentu sira fó fuan” Amu-Papa hateten.

“Hanesan Nia halo ho ninia dixípulu foin-sa’e sra, nia fihir ó iha ó-nia matan sira no bolu ó atu tuir Nia, lori ó ba kle’an no soe dai sira hodi konfia iha ninia liafuan,eh, halo ó-nia talentu sira fó fun iha moris, hamutuk ho Nia, lahó ta’uk. Jezús hein ó ho pasiénsia, hein resposta idam hein ó-nia sin.”

Amu-Papa observa katak adolexente sira nia hakaran ba afetu no ternura moris tuir Na’i nia lian permite “atu tau matan ba ema seluk, no sigifika respeira nia, preteje nian no hein nia”.

No ba ida-ne’e eziste liberdade katak don atu hili didi’ak. Tuir Papa Francisco “ema livre mak ida ne’ebé hili buat di’ak, buka buat ne’ebé haksolok Maromak, maski susar. Maibé ho opsaun barani no forte de’ir mak bele realiza mehi boot sira, mehi sira ne’ebé merese atu ita gasta moris”.

“Imi-nia ksolok la iha presu, la komersializa mós. La’ós applikativu ida ne’ebé deskarega husi selulár, la’ós mós versaun ikus liu mak bele tulun imi atu sai livre no boot iha domin”, Amu-Papa sublliña.

Iha omilia nia rohan, Papa Francisco deklara katak adolexente sira iha kapasidade ba jestu sira amizade no laran-di’ak boot nian, kapasidade atu harii futuru nu’udar Jezús nia dixípulu sira.