Madre Yvonne ba Salesianu/a kooperadores no Vides

Sam Phran (Tailándia) – Madre Jerál nia prezensa iha Tailándia, sai momentu oportunu ba enkontru ho grupu oioin, no ohin, 24 Abríl iha mós enkontru ho Salezianu/a kooperadores no Vides. Enkontru hahú ho grupu rua ne’e ne’ebé aprezenta sira-nia atividade ba Madre Jerál, ohin marka prezensa de’it reprezentante balun husi komunidade tomak Tailandia nian, maibé sira hakarak hato’o sira-nia ksolok no disponibilidade atu serbisu ho irmán sira.

Me. Yvonne hatán hodi agradese ba oportunidade atu hasoru Salesianu/a Kooperadores no membru VIDES nian, tanba sira ne’e Família Salesiana. Madre nia liafuan ruma mak ne’e:

«Salesianu/a Kooperadores mak grupu ida ne’ebé don Bosco rasik mak hari’i, tan ne’e kooperadór sira iha ona iha Don Bosco nia fuan hamutuk ho SDB no FMA sira no, atu ko’alia loos, Don Bosco hanoin ba sira iha komunidade no uma laran.

Don Bosco komprende katak atu lori ba oin misaun edukativa ida presiza ema barak, tenke tau hamutuk ema hotu ne’ebé fiar ba edukasaun nia forsa. Nia hanoin katak SDB no FMA la to’o, presiza mós leigu sira (no mós nia hanoin ba Bispu sira no amlulik diozesanu sira).

Iha FS Kooperadór sira iha importánsia espesiál tanba sira iha vokasaun ida, bolun husi Maromak ne’ebé hili ema ida-idak iha vokasaun ida ne’e no, oras ne’e, imi hatán ona ka sei prepara daudaun atu hatán Sim ba Maromak. Tanba ida ne’e mak Maromak nia inisiativa, ita bolu “vokasaun” no promesa halo imi sai membru ativu iha FS.

Se ida ne’e mak vokasaun ida, imi presiza hakle’an espiritualidade salesiana, katak moris imi-nia vida sarani ho karizma salesianu, imi tenke prezente iha Kreda ho karizma ida ne’e, imi presiza haka’as an iha misaun. Molok halo buat barak, buat ne’ebé importante mak moris fiar nian, relasaun ho Maromak, husi Maromak nia Liafuan book imi-nia laran, moris tuir Evanjellu nu’udar vokasaun, lori, iha imi-nia moris, preokupasaun ba foin-sa’e, hatene katak imi mak edukadór/a nafatin, la’ós de’it profesór sira, maibé iha fatin hotu iha ne’ebé imi serbisu, tanba moris nu’udar edukadór/a halo parte ita-nia an rasik. Imi simu karizma salesianu nu’udar prezente; bainhira imi sente vokasaun nu’udar Salesianu Kooperdór/a, ne’e katak imi sente karizma salesianu iha imi-nia laran, la mai husi liur, maibé Maromak nia prezente iha imi-nia laran, prezente hanesan Don Bosco no Madre Mazzarello nian. Tan ne’e, uluknanain, ita presiza agradese ba prezente ida ne’e. nia hanesan fini ida ne’ebé tenke buras, no nia sei buras hodi hakle’an moris salesiana, hodi fó an ba ema seluk. Tan ne’e presiza momentu formasaun nian no fahe nian.

Iha Karta Identidade FS nian hakerek katak SDB, FMA no Salesianu/a Kooperadores mak pontu de refere ba FS tomak, tanba grupu 3 ne’e don Bosco mak hari’i….

Edukasaun mak kondisaun futuru nian ba sosiedade no Kreda, tan ne’e imi bele tulun família barak ne’ebé la hatene eduka sira-nia oan sira, família sira ne’ebé iha difikuldade atu hala’o sira-nia moris familiar. Imi bele tulun FMA sira atu to’o ba foin-sa’e no ema iha difikuldade laran, imi bele to’o  periferia iha ne’eb’e ladún iha prezensa sarani nian, imi bele tulun atu hasoru realidade sira ne’ebé presiza karizma salesianu. Imi tenke prontu atu halo hodi tau hamutuk kbiit barak no hat ba ezijénsia foin-sa’e sira nian. No bainhira kona-ba família tenke hanoin mós ba responsabilidade atu forma foin-sa’e sira atu hari’i família; no mós tenke uza sistema preventivu ba foin-sa’e feto sira hodi evita katak sira monu ba “trata ema sira nian”.

Ita presiza hala’o buat hotu ho fuan salesianu, hanesan Jezús ne’ebé sente kompaxiaun. Imi hateke ba Amu-Papa Francisco: nia haree situasaun susar, nia fó hanoin katak Jezús hili kiak sira, nia rasik halo buat ne’ebé nia dehan.

Karizma salesianu iha potensialidade boot moris nian, karizma salesianu mak kriativu, hatene inventa solusaun foun sira ba ohin loron.

No agora ha’u ko’alia ba VIDES sira: voluntariadu mak dimensaun importante iha espíritu salesianu no VIDES koko atu to’o ba labarik no foin-sa’e sira iha fatin susar liu. Voluntariadu mak sinál katak gratuidade mak posivel mós iha mundu ida ne’eb’e buka de’it interese ka osan. Voluntariadu mak sinál gratuidade Maromak nian, sinál domin nian. Esperiénsia voluntariadu nian troka ema nia moris, tanba bainhira ita hasoru kiak sira ita-nia moris tenke troka. VIDES mak sinál FS nian ne’ebé to’o iha ne’ebé sira seluk la to’o, ho foin-sa’e sira ne’ebé prontu atu lakon sira-nia moris tan domin…

FS iha vokasaun atu hada’et domin tanba buat hotu iha ninia vokasaun mak karidade, atu hada’et esperansa, tanba mundu presiza hetan esperansa; iha ema ruma ne’ebé husu oinsá ita-nia futuru: FS hatene katak iha nafatin dalan ida ba futuru tanba Na’i mak moris hi’as no loke dalan hotu. Fs bele hada’et ksolok…

Presiza ema ho orizonte luan, atu, hamutuk ho FMA sira, bele sai misionariu ksolok no esperansa nian…»

Hafoin Madre kontinua hodi hatán ba pergunta ruma ne’ebé Kooperadór balun no membru VIDES balun hato’o. enkontru taka ho foto grupu nian.

(Alma Castagna)