Dili – Atividades husi Ekipa Formasaun ba Formasaun inisial iha tinan ida ne’e ida mak haklean Laudato Sii. Atu bele haklean Laudato Sii  atividade ida mak ba Leurema fatin neebe ita hotu hatene katak bele produz aifunan furak no oi-oin iha ita nia rain laran.  Nune’e iha loron 23 fulan Abril  Aspirante, Postulante no Novisia hamutuk sira nia formadores, ba iha Leurema: Ho Objetivu: kontaktu, apresia no hadomi natureza. Wainhira ami sai husi Dili ho entuziasmu boot, maski dalan la dun diak maibe wainhira to’o iha iha Leurema, la iha lia fuan seluk, haluha hamlaha, kolen maibe mosu sentimentu hahi no agradese ne’ebe nunka para, to’o ami ba fatin ne’ebe  familia  prepara ba ami. Ami agradese tebes ba familia ne’ebe simu ami oin seluk liu ami la espera maibe sira oferese  buat hotu, fatin aihan  no aifunan sira ne’ebe oferese mai ami gratis, sira haksolok tebes ba ami nia vizita. Tuir mai ita bele rona esperiensias ruma husi ita nia formande sira.

 Aspirante no Novisia nia liafua:

“Agradese tebes Na’I ba esperiensia ohin. Hau nia fuan nakonu ho ho ksolok hodi agradese Na’I, bainhira hau mai to’o iha fatin ne’e, hare ba aifunan ne’ebe furak, hakmatek,familia no ema hotu ne’ebe kontente hodi tau matan ba natureza, hau la iha buat seluk atu dehan se lae mak hahi no haksolok; no la bele imajina se kriasaun deit sai furak nune’e? Furak oin sa ida ne’ebe hakiak?” (Ingracia).

(Husi Alexandrina Pinto)