Kontinuasaun katekeze kona-ba Kredu

Sidade Vaticano – Amu-Papa Bento XVI kontinua katekeze  iha kuarta ne’e, loron 6 Fevereiru, kona-ba Profisaun Fiar Katólika – Kredu. Nia aborda temátika kriasaun Maromak nian, ilas jardín Éden nian, figura sira Adão no Eva nian no realidade salan orijinál, ne’ebé sita iha livru Génesis nian.

Kredu kualifika Maromak nu’udar “Aman bele hotu-hotu” ( “Pai Omnipotente”) no “hakiak lalehan no rai” (“Criador do céu e da terra”), fraze ne’ebé temi iha livru kriasaun nian. Amu-Papa afirma katak Maromak mak buat hotu nia orijen no iha kriasaun nia fafurak hatudu sai Aman Maromak nia beran boot. Fiar, mak baze atu rekoñese katak mundu ne’e Maromak mak hakiak hodi nia futar Liafuan.

[Asesu kópia ho lia-portugés]

 

Hodi sita livru kriasaun nian, Génesis, Bento XVI, interpreta, hahú uhusi revelasaun bíblika katak, Maromak nia hanoin uluk liu bainhira hakiak mundu mak hetan domin ida ne’ebé hatán ba nia domin. Hanoin seluk mak hakiak mundu materiál atu koloka domin ne’e, kriatura sira ne’ebé ho liberdade hatán ba nia domin.

“Maibé ita-nia pergunta ohin mak ne’e: iha tempu siénsia no téknika nian sei iha sentidu ko’alia kona-ba kriasaun?”, Amu-Papa husu. Tuir nia, Bíblia la’ós manuál ida siénsias naturais nian;  maibé hakarak halo ema komprende lialoos auténtika no kle’an sasán sira-nian.

Bento XVI kontinua katekeze hodi esplika ilas tahu nian. “Ida-ne’e signifika katak ita la’ós Maromak. La’ós ita mak halo ita-nia an rasik, ita mak rai: maibé signifika mós katak ita mai husi rai di’ak, hodi Kriadór di’ak ninia obra”. No tuir Amu- Papa, jardín Éden nian hatudu realidade iha ne’ebé Maromak tau ema bá la’ós ai-laran fuik ida, maibé fatin ida ne’ebé proteje, habosu no sustenta.

“Ema tenke rekoñese mundu la’ós nu’udar propriedade ida atu assalta no esplora mohu maibé nu’udar don Kriadór nian, sinál ninia vontade salvífika, don ne’ebé tenke kultiva no proteje, halo sai buras no dezenvolve iha respeitu no armonia, tuir ritmu no lójika, tuir Maromak nia planu (kf Gen 2,8-15)”, Amu-Papa salienta.

Hafoin, Santu Padre esplika figura samea nian nu’udar sinál tentasaun nian ne’ebé buka lori ema atu ko’a ninia relasaun ho Maromak, hodi tau iha ema nia fuan dúvida no inimizade ho ninia Kriadór.

Tuir Amu-Papa, samea kuda suspeitu katak aliansa ho Maromak hanesan  moris iha dadur, halakon ema nia liberdade no halo ema labele goza buat furak no murak moris nian. Samea, nu’udar sinál tentasaun nian, lori ema atu labele simu ninia limite sira nu’udar kriatura no atu hanoin katak dependénsia ba Maromak nia domin nu’udar Kriadór, mak naha todan ida ne’ebé ema tenke liberta an.

Ikusnian, Amu-Papa, hodi komenta realidade salan orijinál, afirma katak “salan hamosu salan no salan hotu iha istória kait malu entre sira”. Tuir nia, salan sgnifika estraga ka harahun relasaun ho Maromak no iha ninia esénsia signifika tau an iha Maromak nia fatin.