Baucau – Atu selebra Loron Mundiál Orasaun nian ba Vokasaun sira, Dioseze Baucau liuhusi vigararia asuntu pastorál, Missio Baucau, Komisaun relijiozu/a sira, parókia rua iha Baucau, kolabora atu organiza eventu ne’e hodi envolve liuliu labarik/adolexente sira husi “Obra Pontifícia Infância e Adolescência Missionária” (OPIAM).

Maski nune’e, sarani sira Baucau nian hatudu partisipasaun maka’as, hodi prepara ba eventu ne’e liuhusi sesaun oioin hanesan dekorasaun, akomodasaun, lojístika, hahán, transporte, nst.

Atividade sira ne’ebé tama iha programa husi loron 15-17 Abríl 2016 mak hanesan tuirmai ne’e: loron 15 Abríl, OPIAM sira ba Dili atu lori ilas S. João Paulo II nian, padroeiru Missio Timor-Leste, ne’ebé rai iha Tasi-Tolu mai Baucau, akompaña husi D. Basílio do Nascimento no D. Virgílio do Carmo da Silva; loron 16 Abríl, iha dadeer to’o meiudia, relijiozu/a sira halibur ba semináriu, iha-ne’ebé sira reflete kona-ba “mizerikórdia iha moris konsagrada” ne’ebé fahe husi Ir Jacinta Gusmão fma no “Laudato si”, ne’ebé partilla husi Ir Luz Stella Ruiz fma no labarik sira orfanatu nian ho “opera” furak ida. Iha kalan  ilas S. João Paulo II nian to’o no taka ho Eukaristia ho intensaun ba “vokasaun sira”, prezide husi Amu Virgílio no anima husi relijioza/u sira. Loron 17 mak loron tutun ba eventu ne’e: dadeer hahú ho orasaun laudes prezide husi Amu Basílio; depoizde matabixu OPIAM sira rona partilla moris vokasaun nian husi frater Abílio, Irmán Canossiana ne’ebé aprezenta Ir Erminia Cazzaniga nia moris (mate iha Lautém), Irmaun Marista sira no sasin video-clip misionáriu Salezianu Pe. João de Deus Pires. Partilla ne’e la’o ho tema katak iha Kreda mak ita-nia vokasaun moris no sai buras. “Vokasaun sai boot no buras liuhusi esperiénsia apostólika ho komunidade Kreda nian, hanesan sai katekista junior hamutuk ho katekista di’ak ida, esperimenta evanjelizasaun hamutuk ho komunidade relijioza, halo esperiénsia orasaun iha komunidade klauzura, halo esperiénsia pastorál ho amlulik sira iha parókia no dioseze no seluk tan. Komunidade ekleziál mak nafatin espasu edukativu fundamentál atu vokasaun buras” (Papa Francisco).

Hafoin, labarik sira fahe ba grupu sanulu-resin-haat tuir obra mizerikórdia sira atu hakle’an obra ida no hafoin ba pratika iha bairru, ospitál ka fatin ne’ebé grupu hili atu bá. Molok bá, labarik sira kumprimenta Amu-Basílio ho hananu inu Infánsia Misionária nian nune’e mós rona lia-menon husi D. Basílio rasik. Nia husu labarik sira atu hanorin nia kona-ba obra mizerikórdia sira, hafoin D. Basílio foti Jezús nia liafuan dehan ba sira: “Bá no halo tuir”, katak ba pratika obra sira-ne’e.  Eventu nia tutun mak ordenasaun diakonál ba Fr. Abílio da Costa (diosezanu) ne’ebé iha nia sasin hateten katak ninia atrasaun ba vokasaun buras iha Kreda, iha oratóriu salezianu.

Bele hateten katak atividade sira-ne’e hotu book labarik sira nia fuan. Ida-ne’e bele haree, bainhira liutiha sasin moris konsagrasaun nian, labarik balun hakbesik ba Irmán sira atu ko’alia kona-ba sira-nia mehi no obstákulu sira hetan husi família rasik. Fini vokasaun loloos, tenke kari uluk iha igreja doméstika, katak família. Hanesan Amu-Papa husu atu batizadu ida-idak sente hola-parte no responsabilidade ba vokasaun sira.

Labarik sira-nia entuziazmu no kole-laek, halo atu boot sira mós la sente kole, sente enerjia foun, tanba labarik sira ne’e hatudu tebes kreda foin-sa’e no dinámika nia ilas, Kreda dioseze Baucau ne’ebé hakarak sai Kreda ida iha-ne’ebé sarani hotu sente hola-parte bá.

Partisipa iha eventu ida-ne’e mós, bainaka OPIAM husi dioseze Maliana no dioseze Dili.