Domingu IV Tempu Paskál mak “Domingu Bibi-Atan Di’ak” nian, basá tinan-tinan liturjia propoin mai ita kapítulu 10 Evanjellu nu’udar João haktuir, iha-ne’ebé aprezenta Jezús nu’udar Bibi-Atan Di’ak. Ne’e mak tema sentrál ne’ebé Maromak nia Liafuan ohin propoin mai ita.

Evanjellu aprezenta Kristu nu’udar Bibi-Atan Di’ak, ho misaun atu lori moris nakonu ba bibi sira nia luhan nian; bibi sira, hetan konvite atu rona Bibi-Atan, atu simu ninia proposta no tuir Nia. Halo nune’e mak sira sei hetan moris nakonu.

Leitura dahuluk propoin mai ita atitude diferente rua hasoru Bibi-Atan (Kristu) nia proposta. Husi sorin ida “bibi sira” nakonu ho autosufisiénsia, kontente no hakmatek iha sira-nia serteza sira; husi sorin seluk, bibi sira ne’ebé atensaun nafatin ba Bibi-Atan nia lian, prontu atu tuir Nia iha du’ut matan ne’ebé fó moris.

Leitura daruak aprezenta meta finál bibi sira ne’ebé tuir Jezús, Bibi-Atan Di’ak: vida totál, ksolok rohan laek nian.

Download