Jezús mak Maromak nia mizerikórdia halo an ba ema
RV – Iha audiénsia jerál kuarta, 6 Abríl, Papa Francisco hahú siklu foun katekeze nian kona-ba mizerikórdia/laran-sadia. Tema ne’ebé reflete iha momentu ne’e mak mizerikórdia iha ótika Evanjellu nian, hodi hanoin oinsá Jezús rasik realiza mizerikórdia ida-ne’e.
“Jezús mak Maromak nia mizerikórdia halo an ba ema. Mizerikórdia ne’ebé nia espresa, realiza no komunika nafatin (…) hodi bá hasoru ema lubun-boot sira, haklaken Evanjellu, tau matan ba ema-moras sira, perdua ema sala-na’in sira” Amu-Papa dehan.
Ho jestu sira-ne’e, Jezús halo sai vizivel domin ne’ebé la iha limitasaun nakloke ba ema hotu – ne’ebé la ezklui ema ida –, Papa Francisco subliña. Domin ne’ebé reflete mós iha Jezús nia prezensa ne’ebé halo halo fileira atu simu João Batista nia batizmu.
“Ida-ne’e mak faktu ida ne’ebé imprime marka desiziva ida ba misaun tomak Kristu nian. Nia la aprezenta an ba mundu iha tempu nia nabilan – nia bele halo ida-ne’e –, nia la haklaken ho trombeta lian – nia bele halo ida-ne’e –, nia mós la aprezenta an iha hatais juzi ida-nian – nia bele halo ida-ne’e”, Amu-Papa tenik hela de’it.
Papa Francisco fó hanoin katak, dala barak, ema sira julga ema seluk, envezde reflete kona-ba sira-nia salan rasik, basá ita hotu ema sala-na’in. “Ita ida-idak devia husu ba an rasik: “Loos, ema ne’ebá ema sala-na’in. Maibé, ha’u?”. Ita hotu ema maksalak, maibé ita hotu simu perdaun, ita hotu iha posibilidade atu simu perdaun ne’e, katak Maromak nia mizerikórdia”.
Iha Jezús nia oras terus/paixaun nian nia la esklui ema ida iha ninia orasaun: “Ida-ne’e signifika katak ita labele ta’uk atu rekoñese ita-nia an no konfesa ita-nia salan sira (…) ita labele ta’uk ita-nia mizéria sira: no ita ida-idak iha ninian. Maibé Krusifikadu ninia domin nia kbiit ne’ebé maka’as la koñese obstákulu sira, no mizerikórdia ida-ne’e kansela ita-nia mizéria hotu”.
