Venilale – Ho ksolok Kristu moris hias nian, ami simu don especial husi Maromak liu husi Irmán Alma Castagna   ne’ebé halibur ami Juniores-FMA nian hamutuk 17,  iha Venilale husi loron 29/03/2016 to’o 4/04/2016 hodi fó formasaun no tempu hanesan ami mós hetan oportunidade hodi  aprende Lingua Italiano husi Irmán Mariarita, ne’ebé maske tempu badak maibe ami kontenti  no agradese tebes ba Irmán nia dedikasaun no laran luak tanba bele fahe ho ami matenek kona ba lingua. Ema hotu dehan wainhira ita hatene lian inan nian mak segredu atu hadomi liutan karizma no loke-an ba mundu. Nune’e ami hakas-an tebes iha loron hirak ne’e hodi buka hakle’an.

Iha loron dahuluk Irmán Alma fó konferensia kona ba liberdade pessoal no konstrusaun komunidade nian. Iha ne’ebé dehan:

• Tulun malu lori maluk nia todan, Kristu mak ita nia modelu: Nia hatudu oinsa kria unidade no ita tenke hadomi hanesan Nia. Atu hadomi hanesan Nia laos realizasaun espontaña maibé presiza halo dalan naruk no liberta ita nia-an rasik atu bele hadomi maluk sira ho sira nia frakeza, problema no difikuldade sira.
• Presiza empenho axetiku, aten brani atu renunsia ba ita nia-an rasik no nakfilak atitude sira ne’ebé la harii komunaun no buka sai konstrutor la’os sai konsumador komunidade nian (se hakarak simu, tenke fó )

Kualidade ne’ebé presiza atu harii komunidade ne’ebé di’ak mak: Delikadeza, kontrola-an rasik, sinseridade, laran midar, espiritu fahe nian no hatene hamnasa ba ita nia-an no  kualidade seluk tan ne’ebé mai  husi majisteriu Kreda nian propoin. Ne’e mak: Transparensia, konfiansa ba malu, kapasidade ba dialogu no tuir dissiplina komunitaria nian. Nune’e iha perguntas dehan oinsá komunika tuir dalan dokumentu nian ne’ebé propoin?  Ami nia resposta simples tuir grupo nian ne’ebé sujere mak simu no konese-an rasik no atu konhese malu diak presiza favorese rekreiu sira iha komunidade, akompana malu no paseio komunitariu.

  Loron tuir mai fó mós input kona ba Komunidade relijioza no ema nia maturasaun. Iha dokumentu ne’e aprezenta pontu ruma ne’ebé tulun ami ida-idak atu avalia ami nia maturidade nu’udar grupo no pessoal.

1. Identidade:

• Maturasaun umana lao hamutuk ho identifikasaun ho Maromak nia bolun. Maturasaun espiritual, fo importansia ba guia espiritual no loke-an ba espiritu santu tulun atu forma-an hanesan Kristu no ikus liu maturasaun kultural tulun ami atu hasoru dezafiu missaun nian.

2. Afetividade:

• Ekilibriu psikolojiku (ema forte ke la presiza aitonka) Liberdade afetiva iha ne’ebé hadomi ninia vokasaun no hadomi tuir ami nia vokasaun nia karakteristika. Hodi lasadere ba ema seluk no buka ema nia apoio.

Depoizde konferensia Irmán fó ba ami serbisu pessoal no grupo Iha ne’ebé lori ami hodi haree ba  Dokumentu ne’ebé  afirma katak atu bele to’o sinfonia komunitaria no apostolika presiza halo saida?

1. Selebra no agradese hamutuk ba prezente komun vokasaun no misaun nian ami haree iha (Kol . 1:3-4)
2. Halo buras respeitu ba malu hodi simu sira ne’ebé lao neineik liu no sira ne’ebé iha kapasidade barak (1 Kor 12: 22-26)
3. Orienta-an ba missaun komun
4. Hanoin hetan katak misaun apostolika uluknanain mak komunidade nian (Act 2: 42-45)
5. Bainhira simu missaun pessoal ida, tan obediensia, komunidade mak haruka, nune’e hatene envolve mos komunidade iha laran. “husi ha’u ba ita”.

Idea forsa sira ne’ebé ami hili no  empeñu sira atu moris tuir

1. Komunidade mak fatin no ambiente atu hala’o prosesu kresimentu. ( Buka tulun malu atu haburas-an)
2. Tulun malu atu hatan ba moris nu’udar ema konsagrada, fiel ba karizma no domin ba kiak sira (Suporta malu)
3. Buka nafatin sai ksolok iha komunidade (Fo valor ba rekreiu )
4. Buka tulun malu hodi moris iha karidade ne’ebé lo’os (Koalia diak ba malu).

Ho  fuan sinseru nakonu ho gratidaun ami hotu agradese ba akompanamentu durante semana ida ba dedikasaun, disponibilidade no ksolok fraterna ne’ebé fahe hamutuk. Obrigada.

(Agata/Junioras)