Irmán doben sira, foin-sa’e sira, família sira, leigu no leiga sira, kolaboradór no kolaboradora sira,

Ha’u mai hasoru imi ho fuan nakonu ho esperansa no ksolok iha tinan 2013 ne’ebé foin hahú. Ita iha Tinan Fiar nian ne’ebé lori dezafiu Evanjelizasaun Foun nian. Reitór-Mor fó mai ita estrétia furak ho títulu: “Hanesan Don Bosco, ita oferese ba foin-sa’e sira Evanjellu ksolok nian liuhusi pedagojia laran-di’ak nian”. Tema ne’e la’o hamutuk ho buat ne’ebé Kreda husu ba sarani ida-idak, husi ema konsagradu/a sira atu sai evanjelizadór/a no edukadór/a sira ho bolun atu akompaña foin-sa’e sira iha sira-nia deskoberta kona-ba Maromak nia projetu ba sira-nia moris. Ita simu konvite husi padre Pascual Chávez, atu hakbesik Don Bosco Edukadór nune’e hakle’an Sistema preventivu hodi valoriza pedagojia fuan nian, hodi halo nia sai programa moris nian iha nivel pesoál no komunidade edukativa.

Madre Jerál iha ninia aprezentasaun kona-ba estréia nia fó apelu esplisitu ida: “Ho haraik-an no konviksaun, ita husik estréia interpela ita no haka’as an ho ksolok, ho laran-manas foun no kompeténsia profisionál, atu tradús iha moris buat hotu ne’ebé propoin mai ita. Ida-ne’e mak oportunidade di’ak ida atu avalia ita-nia estilu moris nian, atu hamutuk sai metin iha Evanjellu nia anúsnsiu”.

 

Iha fulan dahuluk tinan nian, riku ho festa saleziana sira, mai ita hafoun ita-nia domin ba Don Bosco moris tuir nia iha ninia hilin ba Maromak no ninia determinasaun atu saran moris tomak, nune’e foin-sa’e sira bele koñese Maromak nia domin. Nu’udar komunidade edukativa mai ita fahe don espirituál sira atu haklaken Evanjellu ksolok nian iha família, iha eskola, iha ambiente sira serbisu nian hodi moris hanesan Don Bosco no Madre Mazzarello, pedagojia laran-di’ak nian. Iha tinan pastorál foun ne’e ita-nia fundadór sira fó konvite pesoál ida: “tau iha ó-nia oin hamnasa no kuda iha ó-nia fuan laran-di’ak”. Mai ita ida-idak buka aproveita patrimóniu espirituál ida-ne’e hodi halo nia fó fuan iha ita-nia realidade iha Timór no Indonézia!

Ita mós tama ona iha tinan ikus preparasaun nian ba jubileu prezensa FMA ba tinan 25. Ita intensifika ita-nia “agradesimentu” ba Maria liuhusi saran-an kontínua ba Nia, nune’e nia bele kontinua halo kmanek boboot iha ita-nia moris no iha realidade Inpetoria nian. Ita halo sai ita-nia orasaun hasa’e an nian ida-ne’e:

 

Ita rahun di’ak tebes, ó Maria, Virjen ho fuan boot.

Ho domin Inan nian ita hatene

Sema ida-idak nia espetativa subar iha fuan laran,

Ne’ebé buka sentidu auténtiku ninia Vokasaun rasik.

Fó korajen ho fuan inan nian hakaran kle’an moris ida-idak nian,

Atu hatene saran an nu’udar don no servisu ba Kreda.

Lolo ita-nia liman nakloke mai ami,

Bainhira dalan sira hilin nian sai susar no todan.

Haraik mai ami ita-nia fiar transparente, bainhira ami-nia fuan namlele no lahakmatek.

Fó mai ami ita-nia harohan konfiansa nian atu komprende, atu la’o ba oin, atu serví.

Virjen Inan, simples iha fuan.

Virjen Biin, apoiu iha dalan.

Virjen Belun, sin moos nian ba Domin.

Harohan daet ba Vokasaun santa sira, don ksolok nian husi Maromak nia Karidade. Amen

 

Ha’u taka hodi agradese imi ba prezente orasaun no domin nian ba irmán Angelita. Ita kontinua husu ho fiar boot don saude nian liuhusi beata Maria Troncatti nia intersesaun!

Mai ita sai ida de’it iha dalan domin nian!

Ir. Paola Battagliola