Baucau – Loron Kinta Santa mak loron iha-ne’ebé liturjia hanoin eventu rua: 1) loron instituisaun ba ministériu saserdotál; 2) loron instituisaun Eukaristia nian. Buat rua ne’e la haketak malu maibé iha ligasaun íntima. Lahó ida, ida seluk labele eziste.

Amlulik na’in 58 husi dioseze Baucau tomak ohin, 24 Marsu, hamutuk ho Amu-bispu hafoun fali sira-nia promesa bainhira simu sakramentu Orden.

Amu Basílio do Nascimento fó hanoin fali ba amlulik sira kona-ba identidade amlulik nian. Iha Testamentu Tuan Na’i haruka ema bainhira Na’i haree situasaun umana no sosiál ne’ebé presiza tulun, entaun Nia bolu no haruka ninia manu-ain sira. Atu fó hanoin fali identidade amlulik nian tuir Testamentu Foun, Amu Basílio atinje husi S. Paulo nia surat sira hodi define knaar sira amlulik nian: “Forma Kristu iha sarani ida-idak” (kf Gal 4,19); “atu buat hotu sai ida de’it iha Kristu (Cor4); no “atu halo ema sai perfeitu iha Kristu” (Col1).

“Sai perfeitu hanesan Aman perfeitu” mak Kristu rasik nia orden. No ne’e mak objetivu ministru ida ba nia moris rasik no mós ba sira ne’ebé nia servi. No atu halo ida ne’e husu “dores de parto”, ne’ebé amlulik sira esperimenta “bainhira sira hakarak sai fiél ba Kristu, bainhira sira hasoru difikuldade iha ministériu”,  Amu Basílio resalta.

Ba amlulik sira Amu-bispu husu atu hakat husi “pastoral de massa” ba “pastoral e acompahnamento individual”, liuhusi konfisaun no diresaun espirituál. Atu halo ida-ne’e sira presiza tau matan ba sira-nia moris espirituál rasik hodi hakbesik ba bee-matan sira moris espirituál nian.

Nia mós fó sai ninia preokupasaun no dezeju ida: “formasaun konxiénsia nian”. Nia sujere meiu sira liturjia nian, orasaun, kontemplasaun, konfisaun, tempu adorasaun… Amlulik rasik presiza fó sasin kona-ba halo dalan santidade hodi hatudu ba sarani sira katak nia mós ema frajil no haraik an hodi hakbesik ba konfisaun.