Dili – Tinan-tinan, fulan Outubro fulan ne’ebé  Santa Kreda dedika  ba rai Misaun nune’e nu’udar kostume eskola nian aleinde reza tersu iha  kada turma  halo mós asaun karidade liuhusi estudante sira  nia esmola husi sira nia osan merenda nian. Hafoin  montante ne’e  entrega ba OPIAM, maibé tinan 2015  grupo infância Missionaria halo hilin ida atu uza osan ne’e  hodi sosa  nesesidade prima  ba ema kiak sira iha Parokia Comoro, liuhusi dados ne’ebé identifika  ona  iha Parokia.

 Nune’e grupu Infância Missionaria Eskola MAria Auxiliadora, Dili, halo preparasaun, hanesan kompras, pack  atu halo  asaun karidade  iha Quarta  feira Santa  dia 23 de Março nu’udar asaun Quaresmal ba ema mukit no kiak sira iha Bairo Bedoku. Maske fatin ne’e dook tebes, sae foho, tun foho, liu mota maibé infância Missionaria sira ho ksolok boot no entusiazmu la’o too iha fatin ne’eba no fahe ba ema kiak sira sasan ne’ebe sira lori, reza hamutuk, fó liafuan di’ak, vizita, no halo esperiénsia nu’udar familia durante loron tomak.

Esperiénsia kiik ne’e  tulun  labarik no adolesente sira atu loke liutan  sira nia matan hodi haree ba maluk ne’ebé hanesan sira maibé laiha possibilidade hanesan sira.

Ne’e mak membru sira Infánsia/adolexénsia misionária nia komentáriu:

“Tebes ita ema hanesan de’it maibé sira susar liu ita” (Olavio)

“Agradese ba oportunidade hodi ami  uza didi’ak ami nia sasan sira” (Novita).

“Di’ak se ita kontinua no konstante ba asaun ida ne’e” (Aleixo).

“Atu sensibiliza liutan ba labarik no adolesente seluk atu sira rasik mós bele halo asaun ida-ne’e, tulun ema ne’ebé kiik liu ita” (Nilton).

Wainhira sira halo tiha sira atividades  ba 41 familia, familia sira prepara aihan lokal hanesan batardaan atu sira hotu han hamutuk. Familia sira ne’e nakonu ho agradesimentu ba  grupo infância ninia laran-luak no sensibilidade ba ema seluk.

(Komunidade Beata Eusebia Palomin/Grinalda-Dili)