Dili – Ema konsagradu no konsagrada sira husi kongregasaun 36 hamutuk ho sira-nia kandidatu feto no mane halibur nakonu iha Kreda Maria Auxiliadora, Comoro, atu selebra loron Vida Konsagrada nian. Selebrasaun ne’e hahú kedas horisehik ho velada ida orasaun nian ne’ebé dura ba oras rua nia laran. Durante velada sira hafoun fali sira-nia kompromisu batizmu no vida konsagrada nian.

Ohin fali, festa hahú ho konferénsia ida husi D. Basílio do Nascimento, bispu dioseze Baucau nian no prezidente konferénsia episkopál Timor-Leste. Konferénsia hato’o kona-ba Sínodu Bispu sira-nian ne’ebé hala’o iha fulan Outubru, 6-28 2012 iha Roma, Itália.

 

Nia aprezenta ninia palestra liuhusi pontu 4 tuir estrutura Instrumentum Laboris, dokumentu ne’ebé uza atu diskute durante Sínodu, hanesan tuirmai ne’e: 1) Katak sá “Nova evangelização”; 2) Tansá “Nova Evangelização”; 3) Oinsá hala’o Evanjelizasaun no 4) Sé mak tenke evanjeliza.  Tuir D. Basílio dezafiu ohin nian mak “batizadu sira”. La’ós pagaun sira.  No evanjelizasaun nia xave mak hato’o Jezús Kristu ba ema sira ho dalan no métodu foun. Jezús Kristu nafatin hanesan, horisehik, ohin no aban. Iha dezafiu tolu ne’ebé sai Kreda tomak nia dezafiu: família, ema konsagradu sira no foin-sa’e sira. Nia realsa tan katak, Kreda ohin bulelu tanba simu tuku husi fatin hotu ne’ebé nia la hein, no tan ne’e nia la prontu atu hatán. Durante Sínodu, bispu sira ko’alia maka’as katak ema kreda nian, bispu sira, amlulik sira, konsagradu sira, tenke hao ezame konxiénsia maka’as kona-ba oinsá ninia prezensa ba ema sira. Atu halo evanjelizasaun bispu sira foti nu’udar íkone Jezús nia enkontru ho feto Samaria nian. Kreda presiza multiplika posu sira enkontru nian, hodi sai komunidade “simun” nian (comunidades acohledoras).

Konferénsia taka ho rekomendasaun husi bispu sira ba Maromak nia povu ne’ebé, hodi tenik Bento XVIdehan katak la’o iha rai-fuik maran ita-nia tempu nian, ita hatene katak ita tenke lori buat ne’ebé esensiál: “Espíritu Santu nia kbiit, Jezús nia kompañia, lialoos Liafuan nian, paun eukarístiku ne’ebé habosu ita, fraternidade komuñaun ekleziál nian no impulsu karidade nian”.

Momentu tuir mai mak selebrasaun eukarístika, iha ne’ebé D. Basílio hodi komenta festa Aprezentasaun Na’i nian, dehan katak “iha ita-nia knaar hotu buat ne’ebé fundamentál mak Ema ida: Na’i. Ita iha knaar importante liu mak aprezenta Jezús ba ema sira. Ita halibur ema hodi ko’alia kona-ba Maromak ba sira. Buat seluk sai dekorasaun de’it: servisu sosiál, servisu umanitáriu, katekeze, hanorin….”

Iha ikus nian, Jezús rasik dehan liuhusi evanjelista Lucas katak bainhira ita halo buat hotu ona ita tenke dehan ba ita-nia an katak “ita mak ‘servos inúteis’ de’it”, D. Basilio hateten.

Festa kontinua ho almosu fraternizasaun nian no konvíviu iha Centro de Formação João Paulo II. Ikusnian, bainhira festa remata ona, superiór no superiora sira halibur malu  ba komunikasaun ruma kona-ba CONECTIL no mós kona-ba oinsá hala’o Tinan Fiar nian.