Baucau – Iha inísiu Semana Santa nian, ami komunidade Baucau ho ksolok boot simu Irmán Alma Castagna, provinsiál FMA iha ninia vizita kanónika. Maski nia too iha komunidade sábadu, 19 Marsu kalan, maibé iha Domingu loraik labarik oratorianu sira husi Diwake, Teulale, Grupu Infánsia no Adolexente Misionária hamutuk ho reprezentante husi grupu Laura Vicuña no mós animadór/a halibur hamutuk iha komunidade atu hato’o “benvinda” hodi agradese ba Irmán Alma nia prezensa.

 Atividade hahú ho orasaun nu’udar espresaun ksolok no gratidaun nian ba Maromak, tanba hanesan Maria,  Ir Alma hakat to’o iha ami-nia komunidade hodi haree, rona, akompaña no suporta ami iha ami-nia moris espirituál, komunidade no apostoladu ho foin-sa’e no labarik sira.

Iha orasaun nia laran uza bee nu’udar símbolu ne’ebé fó moris no haburas; labarik ida-idak lori sira-nia virtude no kompromisu hodi haburas ai-hun ne’ebé maran. Jestu ida ne’e fó hanoin fali obra sira mizerikórdia nian husi pontudevista edukativu nian,  iha roman domin Aman nian hodi promove moris no moris ne’ebé naresin. Nune’e porta santa solidariedade nian ita bele loke nafatin ho jestu profétiku liu husi promove kultura moris nian hodi tau matan ba ambiente no ema hotu ne’ebé ita hasoru.

Depoizde orasaun, Ir Alma hatoo nia mensajen ba labarik sira, hafoin labarik sira kumprimenta Ir Alma ho kántiku ‘ksolok ba sira ne’ebé haraik an…” Iha mensajen ba labarik sira, Ir Alma hato’o Amu-Papa Francisco nia mensajen ba labarik no adolexente sira ba okaziaun Jubileu Mizerikórdia nian ne’ebé sei halo iha fulan Abríl iha Roma. Tema jubileu ba labarik no adolexente mak “Sai boot iha laran-sadia hanesan Aman”. Nune’e, konvite atu “buras iha mizerikórdia hodi aprende atu sai aten-barani iha domin konkretu no lahó interese, signifika sai boot iha fíziku nune’e mós iha íntimu”.

Atividade kontinua ho merenda hamutuk. Ambiente nakonu ho ksolok no amizade. Labarik sira sente uma. Sira nia ksolok iha ita-nia ambiente mak nu’udar espresaun espontaneidade ne’ebé haburas esperansa no ksolok iha ita asaun pastorál sira atu ho sira ita la’o iha dalan Aventura espíritu nian.

Vizita kanónika iha Tinan Mizerikórdia hamanas liután Irmán sira nia fuan atu sai laran-sadia hanesan Aman ne’ebé laran-sadia nafatin ba ita hotu!

(Albina do Carmo)