RV – Mizerikórdia no konsolasaun mak liafuan rua ne’ebé orienta Papa Francisco nia reflesaun iha katekeze kuarta 16 nian, iha Prasa S. Pedro. Husi tema ne’e mak nia enfatiza drama migrante sira-nian no lansa filafali apelu akollida eh simun nian.
Papa Francisco fó hanoin kapítulu 30 no 31 profeta Jeremias nian, koñesidu nu’udar “livru konsolasaun nian”, iha-ne’ebé Maromak nia mizerikórdia aprezenta an ho ninia kapasidade tomak atu konforta no loke ema laran-susar sira nia fuan ba esperansa.

Download
Maromak, liuhusi profeta Jeremias, dirije nia an ba israelita sira iha ezíliu iha rai estranjeiru atu pré-anunsia sira-nia fila-hikas ba pátria. “Ezíliu mak esperiénsia devastante ba Israel”, Papa Francisco afirma, hodi esplika katak Israel nia fiar sai nakdoko, basá sente Maromak abandona sira no, haree sira nia rain sai rahun, sira sente difikuldade atu kontinua fiar iha Na’i nia laran-di’ak.
“Maibé iha ha’u-nia neon mai pensamentu kona-ba Albánia no, oinsá depoizde persegisaun no destruisaun maka’as, rai ne’e konsege hamriik hikas iha dignidade no iha fiar”, Papa Francisco fó hanoin, rai leste Europeu ne’ebé nia vizita iha Setembru 2014.
“Ita mós bele moris tipu ida ezíliu nian bainhira solidaun, sofrimentu no mate halo ita hanoin katak Maromak abandona ita (…) Dala hira ita rona liafuan ne’e: Maromak haluha ha’u. Dala barak ema terus no sente abandonadu”.

Migrante sira

Iha pontu ne’e, ho lian triste maibé firme, Papa Francisco temi migrante sira – sira-ne’ebé moris ezíliu ohin loron – ne’ebé moris situasuan real no dramátika ida, dook husi sira-nia pátria, ho hateken marka ho sira-nia uma ne’ebé rahun, ho fuan nakonu ho ta’uk no terus tanba lakon sira nia familiár doben sira.
“SIra na’in hira mak tenta atu to’o iha fatin seluk no ema taka odamatan ba sira! Sira iha fronteira ne’ebá, tanba odamatan barak no fuan barak mak taka metin. Migrante sira ohin-loron nian terus, terus iha kakehan okos, lahó ai-han, no labele tama, la sente simun. Oinsá ha’u gosta haree bainhira nasaun sira, governante sira loke sira nia fuan no loke odamatan sira”.
Entaun, Amu-Papa filafali ba livru konsolasaun nian atu afirma katak Maromak la’ós auzente, tanba ne’e ita labele rende ba dezesperu. “Na’i sei hamaran matan-been sira no sei liberta ita husi laran-ta’uk hotu. Na’I fiél, la abandona iha dezolasaun. Maromak hadomi ho domin lahó limite, ne’ebé sla mós labele hapara, no tanba Nia ema nia fuan sai nakonu ho ksolok no kosnolasaun. (…)
Fila-hikas loloos no radikál husi ezíliu no naroman ksolok nian depoizde nakukun krize fiar nian akontese iha Páskua, iha esperiénsia nakonu no definitiva Maromak nia domin nian, domin mizerikordiozu ne’ebé haraik ksolok, dame no moris rohan-laek”.